Lady Gabriella Windsor a casa cu Thomas Kingston awe 18 di mei na St George’s Chapel na Windsor Castle. E novia a luci esplendido den su shimis impresionante di Luisa Beccaria. E shimis cu ta un soño tin un escote maraviyoso y manganan largo di canchi borda cu ta continua te na su man, casi manera un handschoen. Diseña exclusivamente pa e realesa, cu un velo di seis meter, haci den varios capa di tul ros y blanco den e mesun tono di e shimis, uni pa flornan chikito borda na man.
Gabriella tabata namora pa hopi tempo cu e shimisnan di e diseñadora, y el a bisa cu e tin e suerte cu su ‘dream dress’ ta diseña pa Luisa Beccaria. Hunto cu su ekipo nan ta excepcional y ta encanta cu e resultado di e arte. E confeccion di e shimis a tarda alrededor di cinco luna y solamente a haci tres fittings: uno na Milan y dos na London. Segun e comentario di Luisa Beccaria, cu su sastre ta hopi bon den tuma midi y el a ahusta hopi bon for di un principio, pero Gabriella a perde peso, manera e mayoria di novianan y nan mester a cera e shimis un tiki.
Ta interesante cu e novia a scoge un diseñador italiano debi cu hopi novia real ta opta pa diseñadornan di moda britanico e dia di nan bruid. E dukesa di Cambridge a uza Alexander McQueen na 2011, princesa Eugenie a opta pa Peter Pilotto na octuber aña pasa, princesa Diana a eligi David Emanuel na 1981. Sin embargo, Gabriella ta encanta Luisa Beccaria, cu ken el a saca un potret hunto celebrando e estilo di bida siciliano, e musica y moda na maart 2017. E diseñadora ta describi su estilo como hopi femenino, fresco, romantico y sofistica.
