E edicion di FOCUS pa e luna di october ta brindando mas pagina pa asina entretene su lectornan fiel cu un contenido varia y interesante. Riba e portada ta ilustra Daniela Kuipers Ramos, cu ta comparti su storia con su bida a cambia desde cu su mama a fayece. A pesar di tur cos cu el a pasa aden, el a sigui dilanti trahando pa por come y paga su gastonan mientras e tabata bay Colegio. Awendia cu su 29 aña el a logra adkiri tur e metanan cu el a pone te cu awor y ademas di tur su logronan profesional, Daniela a topa cu e amor di su bida y nan a celebra un ‘fairy tale wedding’ e aña aki.
E matrimonio di Osmar Britten y Carolina de Souza na Medellin, Colombia tabata uno poco menos tradicional y diferente. For di prome instante, Carolina tabata kier un ‘garden wedding’ of estilo campestre. E pareha a skirbi nan propio ‘vows’ y e invitadonan tabata yega den un boto chikito, riba e tononan di violin, cello y piano. Un reportahe fotografico espectacular di e celebracion matrimonial por ser mira den e revista.
For di Argentina Daniela Fernandez a bin traha na Aruba como ‘sommelier’ unda e ta sinti cu e lo bay expande mas su conocimento di e mundo di biña. Den su bida personal, e ta sinti cu a inicia un etapa nobo, completamente distinto. Daniela ta splica den FOCUS con ta scoge un bon biña, y ta comparti algun ‘pairing’ di cuminda y biña cu p’e ta esnan mas exkisito. Haya sa tambe cua ta e ‘faux pax’ mas grandi cu e hendenan ta haci ora di ordena y bebe biña.
E personahe cu un trayectoria di 40 aña den mundo radial y 5 luna como presentado di e programa Nos Mainta, Ivan Kelie JR., ta conta con el a hay’e confronta cu e malesa devastador di cancer. Awendia e mester a haci adaptacion completo na su estilo di bida y ta den e proceso di sanacion ainda. Semper Ivan tabata pidi Dios, pa duna su famia e consuelo, e forza y speranza pa no entrega. No tabata facil, pero nan a surpas’e y a mira luz na otro banda di e tunnel.
