Den su entrevista den Focus Digital Magazine na november aña pasa, Robin Croes, director/fundado di Miss Youth Aruba, a bisa cu nan lo prepara mas duro cu nunca pa e certamen di Miss Youth Aruba 2021. Originalmente na 2020 nan lo a celebra e prome lustro, practicamente tabata cla pa start sali, pero nos a drenta den e pandemia/lockdown. E tabata poco frustrante, pero no por a haci nada. E aña aki si nan a dicidi di sigui cu ne.
E unico adaptacion ta e total di persona cu lo por bay den Renaissance Convention Center, normalmente nan ta sold out e anochi cu 800 persona. Mirando ainda nos ta den un pandemia y mester sigui tur regla di DVG, lo tin menos persona door di social distancing, pero voor de rest tur cos lo sigui normal, manteniendo semper tur protocol di DVG, y e salud di nan candidatanan. Durante e instalacion di e 13 candidatanan dia 17 di april, e publico a haya un glimpse caba di kico por spera e anochi final dia 3 di juli. E tema pa celebra e prome lustro di e certamen ta ‘Viva la Fiesta’ y lo ta un anochi di celebracion cu hopi fantasia y briyo celebrando nan di 1 lustro en grandi. Un show al estilo Las Vegas. Tur e ex-reinanan lo haci un show hunto cu e actual candidatanan.
Mirando awendia e exito cu nan a logra, esaki na su inicio tabata manera tur baby cu ta cuminsa gatia, asina Robin ta bisa cu el a cuminsa cu e certamen. Ta gatia poco poco riba su mesun forsa. E no tabata facil pero tampoco imposibel. Di tur e añanan tras di lomba bo ta siña di bo foutnan, y cada aña bo ta ‘challenge’ bo mes pa ta miho cu e aña anterior. Ora bo ta traha cu amor y cu positivismo, esaki ta bin bek pa bo. Cu awe e por bisa cu Miss Youth Aruba ta super exitoso y ta wordo considera e miho certamen di beyesa aki na Aruba.
E idea pa crea e certamen aki tabata t’ey semper, pero nunca prome Robin a durf di tuma e iniciativa. Semper e tabata manda candidata pa otro certamen, pero na 2016 el a haya e oportunidad pa realisa Miss Teen Aruba. Na 2017 el a bin cu su mesun concepto, fundacion y certamen. Pues na 2017 su baby a nace; Miss Youth Aruba bou di Miss Teen Aruba Foundation.
E LOGRANAN INTERNACIONAL DI MISS YOUTH ARUBA
2017: Celine Shipley – 1st R’Up MYA 2017, a representa Aruba na Curacao den Miss Teen International H2O 2017, el a keda como primera finalista tambe ganando Best National Costume
2018: Sharlena Clarinda – 4th R’up MYA 2017 y tambe Miss Youth Model 2017, a representa Aruba na Republica Dominicana den Princess World International y a keda como e maximo ganadora ganando mas di 10 premio.
2018: Damaris Roga – 3rd R’up MYA 2017, a representa Aruba den e certamen Teen Reina Internacional de Los Mares Y Turismo y a posiciona su mes como 1st Runner Up
2018: Shanty Kanhai – Miss Youth Aruba 2017, a biaha pa Ecuador y a gana e titulo maximo di Miss Teen Earth y Teen Model.
2019: Odalys Rivero – 4th R’Up MYA 2018, a representa Aruba na Miss Turismo Mundial y a keda como Princesa Turismo 2019.
2020: Alexia Chin – 4th R’Up MYA 2019, a representa Aruba pa prome biaha den un certamen virtual y por cierto e prome certamen virtual internacional y a keda como Vi-Reina Reina Virtual Internacional 2020. Alexia ta den pleno preparacion pa bay representa Aruba na Costa Rica na augustus awo, den e certamen di Reina Internacional de los Mares y Turismo 2021.
2020: Daniela Rodriguez – Miss Youth Empowerment 2019, a sa di conkista e titulo di Top Of The World Aruba 2020.
