E entrevista explosivo di prins Harry y Meghan Markle cu Oprah Winfrey den cual nan a expone e kiebro cu e famia real, a ser nomina pa un Emmy Award. E Duke y Dukesa di Sussex, cu a duna bonbini na nan di dos yiu, Lilibet Diana dia 4 di juni, por a hiba cas un gong pa e programa di dos ora, cu a bay den aire na maart y a manda algun onda cu a shock ‘The Firm’. ‘Oprah with Meghan & Harry: CBS Primetime Special’, ta nomina den e ‘Outstanding Hosted Nonfiction Series Or Special category’.
Nan a acusa un miembro anonimo di e Familia Real di racismo, sugeriendo cu e pariente a puntra ‘con scur’ nan yiu lo ta, bisando cu nan a ser expulsa for di Gran Britania, den parti, door di racismo; y a acusa e makinaria di e Palacio di no a duna apoyo na Meghan cu su salud mental. Harry a revela un kiebro asombroso cu su tata, bisando cu su famia a corte financieramente, mientras el a bisa tambe cu e Reina a ser mal asesora y a cancela un reunion programa pa tuma luga na Sandringham.
Meghan a acusa tambe su cuña Kate di a pone yora, cu e ‘senior royals’ a conspira pa garantisa cu Archie nunca lo tin un titulo of siguridad adecuado; y el a bisa cu e funcionarionan no a defende e pareha contra e comentarionan racista, mientras nan ta gaña pa proteha otro miembronan di realesa. E anuncio di e nominacion a bira conoci net despues cu un historiado real a afirma cu prins Harry ta cla pa admiti cu el a comete erornan door di su temperamento desde cu el a renuncia como frontline royal, pero Meghan ta sigui pega na su armanan, y prins William ta kere cu e no a haci nada malo.
