E Duke di Sussex ta skirbiendo un memoir cu ta programa pa ser publica na fin di 2022, a keda anuncia awe pa Penguin Random House. “Mi no ta skirbiendo esaki manera e prins cu mi a nace, sino como e homber cu mi a bira”, e comunicado ta bisa. “Mi a uza hopi petchi durante e añanan, tanto literal como figurativamente, y mi speransa ta cu contando mi storia – e ‘highs and lows’, erornan, lesnan siña – mi por yuda mustra sin importa di unda nos ta bin, nos tin mas den comun di loke nos ta pensa”.
Harry a continua bisando: “Mi ta profundamente agradecido pa e oportunidad di comparti loke mi a siña a lo largo di mi bida y mi ta emociona pa e hendenan lesa un relato di mi bida, cu ta bin di e fuente original cu ta preciso y totalmente confiabel”. E ganashi di e buki y audiobook, cu lo cubri for di su infancia den ‘public eye’ te na su deber militar na Afganistan pa converti despues den casa di Meghan Markle y tata di Archie y Lilibet, lo ser duna como donacion na caridad.
E experto royal, Robert Jobson, a declara cu e buki solamente lo conduci na conflicto y lo perhudica enormemente House of Windsor y e Monarkia como un institucion. E autor cu a skirbi e bestseller ‘Prince Philip’s Century’, a agrega cu Harry ya ta ‘rico y famoso’ y e buki lo no sirbi pa niun otro proposito sino pa ‘causa daño’. El a sigui bisa cu e lo bira un bestseller internacionalmente, pero na ki costo di e monarkia? No lo tin niun luga unda pa sconde. El a compara Harry tambe cu e ruman di su bisawelo, Edward, cu a abdica pa casa cu Wallis Simpson, un Mericano divorcia. No ta prome biaha cu un miembro di realesa den exilio ta skirbi un memoir, King Edward VIII a skirbi uno cu a causa hopi sensacion den añanan 50.
