Februari ta conoci como e luna di amor, un momento pa celebra Dia di San Valentin y pa recorda amor, y loke ta enfatisa e importancia di amor den nos bida. Riba e portada di Focus Digital Magazine ta ilustra e pareha Lisbeth Thijsen y Ramises Ras, cu a conoce otro na cuminsamento di aña 2017 durante e temporada di carnaval. Despues di casi 5 aña cu e cambio di aña net e pagara a caba di zona pa yama 2022 bonbini, Lisbeth Thijsen a ricibi un sorpesa grandi momento cu Ramises a propone matrimonio. Ramesis ta eherce e profesion como polis na Cuerpo Policial di Aruba y Lisbeth ta traha na Dr. Horacio E. Oduber Hospital y actualmente ta un Teamleider.
Pandemia a trece hopi pareha hunto na cas y door di e trabou di Lisbeth y Ramesis tabata net contrario. Pa nan tabata un desafio ya cu na cuminsamento nan no sa kico tabata spera nan eyfo door di nan trabou. No tabata facil ya cu ambos tabata keda traha tin biaha oranan largo apart, sinembargo semper nan a pensa cu esey tabata juist fortalece nan relacion. Ambos tin yiunan grandi caba y despues di basta tempo nan famia a crece ora Mason cu tin awo 2 aña a yega den nan bida. E ta un etapa diferente y maraviyoso cu Lisbeth y Ramesis ta experenciando.
Durante Jerrylaine Britten su bishita na Aruba pa comparti e temporada di Fin di Aña hunto cu su sernan keri, el a keda sorprendi momento cu Moises Roch a bay na rudia pa propone matrimonio. Nan a conoce otro ora cu e pandemia a caba di cuminsa y Hulanda tabatin lockdown, pero esey a yuda cu nan a conoce otro riba un otro nivel door di papia y conoce otro internamente. Tocante nan enlace matrimonial nan no kier a duna mucho detaye, pero loke si ta nan deseo como pareha ta pa sigui crece hunto y eventualmente regresa Aruba pa forma nan hogar cerca di nan sernan keri.
Un topico interesante ta si: ‘e pandemia a cambia con nos ta mira amor’. Romance frecuentemente ta envolve un dinner y wak un pelicula hunto, of asina sip algun drinks y come sushi den un ambiente priva. Esakinan tabata experencianan intimo cu e pandemia a cambia abruptamente, y a wordo reemplasa cu distanciamento social y tapaboca. Pa pone den un manera mas simpel, ‘dating’ durante e ultimo dos añanan tabata encera e riesgo di wordo contagia cu Covid. Ta relata con ‘dating’ lo mustra den un mundo post-pandemia for di e punto di bista di e dating websites y apps.
Mientras e Dia di San Valentin ta acercando, e ta crea un sentimento di emocion den algun persona sperando e dia, sinembargo otro ta kere cu e dia aki no mester ta solamente pa pareha. E por ta un dia pa e ‘solteronan’ tambe por diberti, disfruta y no sinti nan mes fastioso pa un dia cu tin un label riba dje. E preguntanan: ‘Ki e dia aki ta nifica’ y ‘Con ta celebra esaki’, ta wordo contesta pa tres mucha muhe cu te ainda ta ‘soltero y sin compromiso’.
Lesa e interesante entrevistanan cu ta resalta e topico di amor den edicion di februari, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
