E contesta riba e pregunta aki por lesa ampliamente den un articulo, cu ta sali publica den edicion di Focus Digital Magazine di augustus. Ta splica tur loke mester sa tocante e beneficionan pa e salud door di bebe biña, cua tipo ta mas saludabel y su posibel desbentahanan.
Pa trece un resumen di e beneficionan ta cuminsa cu e prome cu e ta rico den antioxidante. Tin hopi alimento y bebida rico den antioxidante, y biña ta uno di nan. E antioxidantenan ta componentenan cu a preveni daño celular causa pa inflamacion y ‘oxidative stress’. Esaki ta un condicion causa pa un desekilibrio entre e antioxidantenan y e moleculenan inestabel yama ‘free radicals’, cu por daña e celnan. Druif tin un nivel halto di ‘polyphenols’, cu ta e antioxidantenan cu a ser demostra cu ta reduci ‘oxidative stress’ y inflamacion.
Hopi hende ta puntra tocante e diferencia entre biña cora y esun blanco. Desafortunadamente, mester mas investigacion riba biña blanco, ya cu mayoria di e estudionan cu ta analisa e beneficionan di bebe biña, a focus mas riba e beneficionan di biña cora. Biña cora a ser reconoci ampliamente pa su concentracion di resveratrol, un antioxidante potente cu ta ser haya den e casca di e druifnan. De facto, biña cora tin te hasta 10 biaha mas resveratrol cu biña blanco.
Lesa loke e investigacionnan ta sugeri den edicion di augustus, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
