E pelicula ‘Cocktail’ di Tom Cruise cual realmente ta un clasico pa hopi bartender, tabata un inspiracion pa Sir Eddy Trenidad te cu awendia el a yega di ta propietario di e famoso ‘Tiki & Co’ na Kralendijk, Bonaire. Sir Eddy a traha den hopi top cocktail bar y el a biaha hopi parti di mundo. Den su trayecto como bartender su conocementro no ta solamente door di su trabou, pero biahando unda e ta conecta cu e cultura atrabes di e cuminda y bebida
E cosnan di mas straño por ta un inspiracion pa pensa di otro manera y yuda e imaginacion crece mas. Pa unda Sir Eddy a yega awe ta hopi aña di experiencia y lesando hopi buki. E ta bay semper bek na su bukinan bieu di receta, cu ta manera oro p’e. E ta atende tambe seminario, tastings, masterclass y bay na e destilerianan na e ciudadnan cu e bishita.
Hopi hende ta puntra dicon e nomber Sir Eddy? Cu un sonrisa e ta bisa cu esey inicialmente tabata door di un amigo cu a yame Sir. Despues Eddy a cuminsa uza Sir como su ‘username’ y siguientemente el a converti den e nomber Sir Eddy, cual a pega y tur hende ta yame pa e nomber ey. E nomber di su bar ‘Tiki & Co’ ta inspira riba Tiki, cu ta mas cu djis un cocktail bar.
Sir Eddy ta den Focus Digital Magazine di e luna di october contando hopi detaye y ta comparti cua ta su cocktails preferi y su plannan pa futuro. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
