Su Mahestad Rey Willem-Alexander Claus George Ferdinand a nace dia 27 april 1967 na Het Academisch Ziekenhuis Utrecht como yiu mayor di Prinses Beatrix y Prins Claus. Dia 30 di april 2013 tabata un cambio importante pa Prins Willem Alexander, door cu el a sigui su mama, Reina Beatrix, como e prome Rey di e Reino Hulandes, despues di un dinastia di hende muher como hefe di estado. Asina cu e aña aki e ta cumpli su di cinco aniversario como Rey.
E aña aki e Famia Real ta bishita e ciudad di Groningen pa celebra ‘’Koningsdag’’ memey di e habitantenan. Esaki ta un tradicion cu Rey Willem-Alexander a mantene, pero si cu algun adaptacion. Naturalmente Reina Máxima ta hunto cu e Rey na e celebracion importante aki.
E pareha tin 16 aña casa y un cos nos no por nenga y ta obvio, cu e pareha real aki ta radia e amor y e felicidad cu nan ta sinti pa otro. Prueba di esaki ta e infinito momentonan capta, unda ta mustra e pareha ta cana contento brasa, cu un hari realmente contagioso y ta disfrutando cu nan tres yiunan, Princesa heredera Catharina-Amalia, Princesa Alexia y Princesa Ariane. 
E pareha real a scoge pa e crianza di e princesanan ta mas tanto priva posibel, pa di e forma aki nan por tin un infancia y hubentud trankilo y parecido na e muchanan di nan mesun edad. Simplemente nan ta un pareha, cu ta refleha e amor pa otro, cu cada bes ta mas profundo y dibertido, segun cu e añanan ta transcuri.
Fotografia: RVD – Erwin Olaf
