NURIANNE ARIAS: “DIABETES NO TA UN CONDICION FACIL”

Tur aña mundo ta uni den luna di november pa conscientisa, educa y informa comunidad tocante e condicion di diabetes y su consecuencianan. E aña aki e tema ta enfoca riba con ta coexisti cu e condicion aki na trabou. E campaña mundial lo enfoca riba con por stimula sosten y bienestar pa persona bibando cu diabetes. No obstante di e enfoke aki, como embahadora di conscientisacion di diabetes y miembro di Fundacion Diabetes Aruba, Nurianne Arias a prepara un campaña pa conscientisa tocante diabetes den tur aspecto di bida. Via e campaña ‘Check e’ organisa pa Fundacion Diabetes Aruba, lo conscientisa riba kico e sintomanan y consecuencianan di diabetes ta pa asina stimula accion pa cuida salud. Hopi biaha hende no ta para keto riba e sintomanan cu nan ta sinti y no tin e curashi pa haci chekeo.

CHECK BO SALUD

DIA MUNDIAL DI DIABETES

14 DI NOVEMBER

Nurianne su meta personal como persona bibando cu diabetes tipo 1 pa mas di dies aña ta pa tur hende cu ta biba cu diabetes ricibi fuera di guia profesional, tambe acceso na informacion, educacion y sosten social. E ta combina diferente actividad pa yega na comunidad di Aruba. Hunto cu Fundacion Diabetes Aruba, e ta participa den actividad di educacion y conscientisacion. Na mes momento, Nurianne ta uza su plataformanan di social media pa comparti experiencia personal cu e meta pa mustra hende realmente con e ta biba cu su condicion. El a scoge tambe pa haci su investigacion cientifico pa su PhD tocante sosten social pa persona cu diabetes.

Ta importante pa monitoria sintoma, conoce bo curpa, haci chekeo y adopta custumber saludabel. Diabetes tin diferente complicacion cu por resulta fatal, pues ta importante diagnostica diabetes trempan pa asina por trata e condicion pa evita cualkier daño.

 

Nurianne ta enfatisa: “Mi ta desea pa tur hende ta consciente cu hende cu ta biba cu diabetes tin e chens di biba un bida saludabel cu e guia y sosten apropia. Diabetes no ta un condicion facil. Cada dia ta completamente diferente maske cu bo ta consistente cu bo tratamento. Como persona cu diabetes tipo 1, mi ta consciente cu mi ta depende 100% di insulina”.

Tin dia esaki ta trece un peso emocional cu ne, pues Nurianne mester a siña expresa ora cu e mester di ayudo of espacio sea di trabou of den su bida priva. E tabata un lucha pa acepta cu e mester ayudo y no ta tur cos e por haci su so. Acepta cu esaki ta okay tabata un proceso pero na final un alivio pa Nurianne sa cu e hendenan t’ey p’e. Den Focus Digital Magazine di november Nurianne Arias como un persona bibando cu diabetes tipo 1 ta comparti su consehonan pa e comunidad di Aruba. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)