Cu un agenda druk cu dianan di trabou hopi largo, esey no ta stroba pa Lelicia sigui su rutina di ehercicio tres biaha pa siman cu un personal trainer. Aunke e no ta baha peso lihe, el a logra baha 15 kilo den e ultimo 3 añanan. E ta hopi satisfecho cu e resultadonan y ta ‘aim’ pa un estilo di bida saludabel.
Lelicia tin 14 aña trahando den prensa y for di cual e tin na Telearuba 10 aña como Director di noticia. El a traha di e periodo for di 2004-2010 y despues di 2014 te cu awor. Lelicia ta hopi enfoca riba su trabou y mainta ora e yega mas tanto e ta pasa door di su mailnan, ta check e ultimo desaroyonan local y internacional online y den corant pa despues cuminsa prepara con e noticia mester ta pa anochi. Si ta necesario e ta bay entrevista e hendenan y cubri e noticia su mes, y ora mester e ta presenta e noticia anochi tambe. Pero en general e ta coordina e schedule di kico ta e topiconan cu Telenoticia lo cubri, unda tur hende mester bay y kico nan mester haci y e ta edit noticia tambe. Na e momentonan aki Telenoticia ta trahando riba algun proyecto nobo y esaki Lelicia ta coordina hunto cu su team.
Un resolucion cu Lelicia a pone pa cumpli prome cu aña finalisa ta cu e kier amplia su conocimento riba algun tereno nobo. Den cuadro di esaki e ta siguiendo diferente curso pa entre otro enfoca su mes mas riba otro cosnan cu e ta haya leuk. Pa ‘distress’ su mes e ta purba di haci deporte y otro hobbynan pa asina e dia ta balansa. Hunto cu su rutina di training e ta purba di haci actividadnan cu su cacho tambe. E ta bay lama regularmente y gusta bay cinema of asina e ta na cas ta lesa buki, cushina y wak Netflix.
Un suceso cu a hasi un impacto grandi riba dje tabata e asesinato di e dos muchanan. E realisacion cu no ta culpa di e famia so of di e instancianan cu mester a actua mas trempan, sino cu nos tur como un pueblo a faya. Lelicia a finalisa cu e siguiente mensahe:”Biba den momento y gradici Dios tur dia pa bo bendicionnan”.
