Awe diadomingo FOCUS a tuma contacto cu e preparador di Kiara Arends, Edgar Kock, pa haya su comentario despues di e certamen di Miss Teen de las Americas ayera nochi na El Salvador. Su prome palabranan tabata cu e ta sumamente satisfecho pa tur loke nan a logra pa Aruba y no tin palabra suficiente pa expresa e alegria y gratitud.
Kiara ayera tabata hopi trankil, cla y sigur di su mes aunke na comienso e tabata un poco nervioso, pero unabes cu Edgar a papia cu ne tur cos a bay suave. Kiara a luci formidabel riba escenario ayera nochi den su presentacion y segun e palabranan di su preparador: “Formidabel… Mihor imposibel. Kiara a traha duro di dia y anochi pa laga Aruba su nomber bon den halto. Kiara a sa di resalta den cada salida riba escenario y duna 100% di su mes”.
Pa e famia di Kiara sinta den e audiencia como tambe Edgar sigur ayera nochi tabata uno cu hopi tension. Hopi hende presente y tambe social media tabatin Kiara como e favorita pa bay cu e titulo maximo.
E comentario di su preparador riba e resultado tabata lo siguiente: “Honestamente mi a kere cu Kiara lo a logra e titulo maximo, esaki debi na su acogida grandi y desempeño durante ful e siman conhuntamente cu su presentacion, sinembargo e cuerpo di hurado a scohe diferente”.
Sigur na Aruba nos ta orguyoso con Kiara Arends a luci den su presentacion riba escenario y su logro como; Virreina de las Americas, Best Body, Best Designers Gala Dress y Best Stylist 2018.
E reconocimentonan internacional pa Edgar ta un sin fin pa menciona, pero sigur e ta orguyoso di retene e titulo di Best Designer pa 3 aña consecutivo pa Aruba den persona di Hilary Gibbs, Danna Garcia y Kiara Arends respectivamente. E momento cu Edgar a ricibi e dos premionan, el a sinti’e hopi emociona y contento, pasobra e premio di Best Stylist ta prome biaha e ta wordo reconoci den un certamen internacional. Esaki pa Edgar ta e fruto di a traha duro pa 1 siman largo pensando cada look, cada cambio, cada strategia cu awe por a wak e logro su tras. E emocion cu el a sinti ora nan a anuncia su nomber como Best Designers 2018 cu un triplete y di biaha nan a menciona pa e no bay leu paso cu el a gana tambe Best Stylist 2018. Edgar ta super orguyoso como tambe contento di trece otro premio importante pa nos dushi isla Aruba.Un pabien Grandi ta bay na Kiara Arends como Virreina de las Americas 2018 y Best Body como tambe Edgar Kock cu su premionan di Best Designers y Best Stylist 2018 den e certamen di Miss Teen de las Americas 2018. E yegada di Kiara Arends ta mayan atardi cu e vuelo di Avianca Airlines y ta spera cu nos por duna nan un bonbini caluroso pa e tremendo trabou realisa den nomber di Aruba.
