E historia di Veronica Luzardo y Diego Galindez no a cuminsa manera un “amor a primera vista” sino como algo cu a bay ta creciendo cu tempo y cu hopi cautela. Ora nan a dicidi di haci nan relacion publico, e sosten di nan famianan tabata clave. E aprobacion pa nan no tabata djis un detaye, pero un fundeshi importante riba cua por a construi cu trankilidad. Nan amigonan mas cercano tabata e sosten silencioso, confidente y compania constante. Sinti nan rondona pa hendenan cu ta stima y ta kere den nan como pareha, a duna e siguridad cu nan tabata construyendo algo duradero. Mas cu un cualidad puntual, locual a pone nan sinti: “Esaki ta e persona cu mi kier casa cu ne”? … tabata e alineacion entre nan como pareha.
Nan ta bin di famianan cercano, a crece cu balornan hopi tradicional y pa ambos tabata cla cu nan kier mesun cos den bida. Veronica y Diego tabata soña cu casa, forma un famia y construi algo stabiel. Fe y religion tambe ta ocupa un luga importante den nan bida y comparti esaki a haci cu hopi decision ta sinti mas natural. Nan no ta perfecto, nan tin caracter distinto y manera tur relacion real, tambe tin diferencianan. Pero aun memey di esaki, semper nan tabata alinea den nan obhetivo- y prioridadnan. Veronica y Diego tabata sa cu no tabata djis tocante amor, pero di cana den mesun direccion.
E proposicion tabata completamente inespera y hustamente pa e motibu ey inolvidabel. El a sosode na St. Regis Aruba tempo cu e tabata den construccion ainda, practicamente cla, pero no habri pa publico. Veronica a pidi Diego pa bay explor’e y experencia e momento ey prome cu otro hende. E tabata asina concentra riba e luga y e bahada di solo cu nunca e no a sospecha kico tabata casi bay pasa. Den un di e suitenan, mientras Veronica tabata prepara pa saca un potret di e bahada di solo, el a tende Diego hari. El a bira rond, confundi y eynan e tabata, ta propon’e matrimonio. E sorpresa tabata hasta mas grandi ora Veronica a realisa cu Diego a planea tur cos di antemano, el a papia cu su tata y tabatin e renchi warda pa basta tempo.
E balornan cu lo bay guia Veronica y Diego segun ta wak futuro hunto ta ‘famia, fe, respet y honestidad’. Nan ta kere den construi un bida cu base solido y den tuma desicionnan importante den ekipo. Den Focus Digital Magazine di e luna aki, Veronica Luzardo y Diego Galindez ta comparti ademas di nan storia di amor tambe potretnan di nan boda espectacular. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
