E ultimo logro di Sarah Toet ganando un Medaya di Oro na “Feria Ganaderia Nacional 2026” na Republica Domicana tabata p’e algo hopi special. E felicidad e momento cu el a tende su number tabata indescribibel. El a sinti hopi orguyo pasobra el a representa Aruba y el a mira cu tur e trabou duro cu el a pone den entrenamento a duna resultado. Sarah a participa den mas cu 20 competencia y a conkista alrededor di 24 medaya. Desde cu Sarah tabatin 14 aña, el a realisa cu ta cabayista lo bira un parti central di su bida.
Actualmente Sarah Toet tin 19 aña y ta corda con tempo e tabata chikito, cu e tabata bay hunto cu su tia na rancho pa mira e cabaynan. E tabata stima hopi e tripnan ey, paso cada biaha e tabata sinti un sensacion di libertad y alegria. E ambiente di rancho tabata trankil y yen di bida, loke tabata haci e experiencia ainda mas bunita. Su tia tabatin un cabay y algun biaha e tabata lag’e subi riba dje y haci un par di ronchi. E momentonan ey tabata hopi special y tabata lag’e sinti unico. Despues di e tempo ey, el a cuminsa ripara cu e tin un amor profundo y duradero pa e cabay aki.
E experiencia di Sarah durante e ultimo competencia no tabata facil, pero cu e confiansa y apoyo di su famia, e guia di su coach, el a logra gana e Medaya di Oro den categoria di Aficionadas 18-20 aña. Ora Sarah a mira tur hende contento, el a record’e pakico e ta haci e deporte aki, cual ta pa e amor y e momentonan chikito cu ta nifica asina hopi. Como amazona e ta balansa disciplina cu e goso door di mantene un bon actitud durante entrenamento. Un dia di entrenamento ta exigente tanto fisicamente como mentalmente.
Fisicamente e mester mantene un bon postura, balans y control riba e cabay henter e training. Mentalmente e mester keda concentra, tene pasenshi y adapta su mes segun e comportamento di su cabay. Sarah Toet ta splica den Focus Digital Magazine di april cua ta e custumbernan cu a forma su exito. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
