Segun e investigacion di “Financial Health network-Gender Gap in financial health” solamente 20% di e hende muhe ta financieramente saludabel caminda e hende homber ta 29%. E hende muhe ta vulnerabel den diferente aspecto por ehempel:
- E hende muhe hopi biaha tin e deber di cuido por ehempel di e yiu(nan)
- Hende muhe hopi biaha tin menos salario of no tin salario cual ta pone cu e ‘buffer’ tambe ta menos of nada
- Hende muhe cu ta depende financieramente di e pareha pero no ta ricibi niun entrada of no ta para keto cu loke e ta haya kisas e por spaar como un buffer den futuro etc.
Cristina Tromp di Balor Consultancy & Consultancy ta splica den Focus Digital Magazine di mei, kico ta importante pa e hende muhe cu tin yiu of no:
- Traha un presupuesto. Maske si ta di locual e kier logra si dado caso e no ta traha.
- Inverti den locual bo kier y logra. Awendia bo por cumpra cursonan online y asina enrikese bo mes cu informacion/ logra estudionan. Hasta por inverti den loke ta trata maneho di finanza.
- Danki na technologia algun di nos por hasta traha via di cas. Pues si no por sali bay traha por haci esaki via di cas pa compania of uza bo talento sea di cushina, arte, etc pa gana placa.
- Corda riba e futuro. E yiunan ta bira grandi sali di cas, pues ta importante tin placa pa sea bishitanan, biaha, gosa bida, etc.
- Un cos cu nos como hende muhe mester haci mas ta haci cos pa nos mes tambe. Percura pa tin e placa pa nos por gosa di nos massage, manicure/pedicure of cualkier cos cu pa nos ta importante. Nos ta sacrifica hopi pa otro enbes di corda tambe riba nos mes. Corda pone esaki den bo presupuesto paso e ta algo indispensabel cu bo kier of no.
Cu bo ta mama of mama den futuro ta importante pa tin e ‘money flow’. Cu no solamente bo tin control di bo cas pero tambe di bo finanza tanto pa bo mes como bo famia. Y tur e yiunan cu bo ta desea… Sigui e consehonan di Cristina Tromp den e revista cu ta accesibel via Apple Store, Android Google Play Store y www.focus.aw (Menu Tab FOCUS DIGITAL)
