AMOR SEMPER TABATA RIBA E MENU!

E combersacion entre Gino Kock y Sra Filomena “Chichi” Croes na Rooi Koochi pa papia un rato tocante nos cumindanan local, a cambia rapidamente mas leu di ingredientenan y e recetanan. Señora Chichi a prepara un Carni Stoba y Gino a probecha saca potret di e plato den su forma final pa su segmento “Cushina Caribense” den Focus Digital Magazine.

Den loke el a prepara tabatin pasion, historia y amor. Mientras Gino y Sra. Chichi tabata papia, el a cuminsa refleha riba cuanto cos cu a cambia. El a corda un tempo cu cabrito y carne tabata parti di bida diario, y e cultura di cuminda no tabata algo separa for di e biba structural, sino algo fiho den dje.

E cumindanan tabata carga nan storia sin tin mester di splicacion. Hende tabata sa for di unda e cosnan tabata bini y kico e tabata nifica pa prepara algo cu cariño. El a papia tocante e generacionnan mas hoben, cu tin menos interes den cushina platonan local. No pa falta di respet, sino pa via di distancia entre e cuminda cu ta wordo prepara y e tempo pa sinta hunto y disfruta di e cuminda. Comodidad a reemplasa tradicion den hopi hogar. Y cu e cambio ey, algo mas keto tambe a disparce. E atencion, e pasenshi y e amor cu antes tabata sinta den e acto di cushina.

Mientras Gino tabata scucha, el a haya su mes ta pensa menos riba e cultura di nos cuminda como un topico y mas riba nos cuminda como un experiencia sutil, importante y cu hopi balor intangible. El a cuminsa corda momentonan den su propio bida caminda cushina nunca tabata un asunto di abundancia, sino di responsabilidad. Temponan cu maske no tabatin hopi cuminda pa ofrece, toch algo tabata wordo prepara, comparti y ofreci cu dignidad y amor.

Den su segmento di e luna aki, Gino Kock ta conta cu mientras e tabata scuchando señora Chichi describiendo loke nos a perde, el a realisca cu no ta simplemente un perdida cultural. E tabata un distancia emocional. Un separacion keto entre e hendenan y e esfuerso invisibel cu ta sostene nan. Ora el a sali for di Rooi Koochi, el a keda refleha riba e palabranan di señora Chichi y ta splica kico ta su conclusion den e revista di e luna aki, cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)