Nos ta biba den e era di e economia di atencion. Cada bes cu nos desblokia e telefon y scroll riba Instagram, nos ta drenta un campo di bataya caminda un gran cantidad di marca ta competi pa e recurso mas scars di e ser humano: nos tempo. Riba e escenario aki, ciencia a demostra loke nos den diseño editorial semper nos tabata sa: nos no ta tuma desicionnan cu logica; nos ta cumpra cu nos wowonan.
E ‘neurociencia’ cognitivo ta revela cu e celebro humano ta procesa imagennan 60.000 biaha mas rapido cu e texto. Ora un usuario ta scroll riba su feed, bo marca tin exactamente 1.7 seconde pa capta su atencion prome cu e sigui. Den e frega di wowo ey, e sistema límbico – e zona di e celebro encarga cu e emocionnan y memoria – ya a tuma un desicion subconsciente riba bo negoshi basa solamente riba loke e ta mira.
Diseño visual no ta djis un elemento decorativo; e ta un trigger biologico. Ora un feed di Instagram ta caotico, ta uza tipografianan eligibel of no tin un palet di color coherente, e celebro di e consumidor ta experencia algo yama “friccion cognitivo”. Confronta cu e desorden, e mente ta bira cansa, ta asocia e marca cu e falta di profesionalismo y ta move bay. Al contrario, un diseño cu ta respeta herarkia visual y espacio den blanco ta reduci esfuerso mental, generando un sensacion inmediato di siguridad, ordo y status.
Con e celebro ta procesa un post den 1.7 seconde.
E wowo humano ta scan e contenido digital siguiendo un trayecto natural den forma di “Z” prome cu dicidi si e kier lesa e ‘caption’.
E celebro ta ‘predecible’ y esun cu siña papia su idioma visual ta logra destaca sin mester grita
Pa empresarionan y marcanan na Aruba, compronde e “magnet invisibel” aki ta e berdadero secreto pa eleva e balor percibi di nan productonan. No ta trata di satura e pantaya cu promocion y texto grandi gritando: “Cumpra mi!” – E ‘Neurodiseño’ ta siña nos cu e celebro ta wordo atrai pa e harmonia. Un tipo di letter elegante serif ta comunica autoridad inmediatamente, mientras cu un combinacion di color corecto por activa e deseo pa cumpra, inspira frescura of transmiti e trankilidad di un hotel luhoso prome cu e cliente hasta lesa e prome palabra di e descripcion.
E feed di bo negoshi ta e vitrina digital di bo compania. Si e arkitectura visual ta malo, consumidornan lo asumi cu bo producto of servicio ta tambe, sin importa con bon e ta realmente. Domina e ‘neurociencia’ di e feed no ta rekeri presupuesto astronomico, sino mas bien strategia y consistencia. Na final di dia, e marcanan cu ta logra bira inolvidabel ta esnan cu ta siña papia e idioma nativo di e celebro: e lenguahe di e wowonan. Diseño ta e brug; crusa esaki strategicamente ta loke ta haci bo imposibel pa ignora.
Pa Mariangela Bracho y José Fajardo
CEOs – Burö Creatives
