E ultimo añanan tin hopi estudio haci tocante amor, pareha y estilo cu bo tin pa relaciona bo mes cu un otro persona. Hopi informacion a wordo adkiri y ta basa riba trabou di antropologo Helen Fisher y treci dilanti pa e autor Roxie Nafousi. Tin hopi teoria, pero un di nan cu ta mas interesante segun e sicologo, Sabrina Sonensein, ta esun di e “tres amor”.
E teoria aki ta conta cu den nos bida, nos lo namora tres biaha, na tres etapa diferente di nos bida. Cada amor ta sinti totalmente unico di e otro y ta siña nos algo diferente cu ta forma e persona cu nos ta birando. E tres tipo di amornan ta; e prome amor, e amor intenso, y e amor incondicional.
E Prome Amor
E amor aki ta sinti manera un cuenta di hada ‘sprookje’. E ta e amor di mucha cu ta absorbe bo completamente y uno cu na e momento ey, bo ta pensa cu lo dura pa semper. Hopi biaha nos ta experencia nos prome amor na scol secundario y usualmente e ta caba, pasobra e dos personanan sea ta crece for di otro of pa motibo di un argumento trivial, cu e relacion simplemente no ta suficientemente fuerte pa soporta. E amor aki usualmente ta mas superficial, cu mas importancia poni riba con e relacion por parce pa otro. Aunke e ta sinti sigur manera amor berdadero na e momento ey, e no ta usualmente e amor profundo y cu lo bo experencia mas despues. E dolor di curason por sinti inmenso inicialmente, pero bo ta recupera di dje rapidamente.
E Amor Intenso
Esaki ta e di dos amor, y usualmente ta esun cu ta pone nos sinti cu nos ta cana riba nubia. E amor ta asina intenso cu ora nos wak e otro persona ta parce cu nos ta mirando nos mes den un spiel: nos ta mira tur nos insiguridadnan, nos necesidadnan, y nos deseonan ta wak bek na nos. Den e relacion aki nos por experencia zelos, miedo y duda den nos mes cu nunca a yega di sinti. E relacion ta bin cu hopi punto halto y punto abou dramatico. Hopi biaha nos ta purba forma e otro mitar den nos pareha perfecto, y nos ta purba forma nos mes pa bira esun di nan. Esaki ta e amor cu ta sinti manera un rollercoaster y esun cu por laga nos sinti proteha, desconfia y herida. E dolor di curason for di e relacion aki por ta inmensamente doloroso, pero ta tambe door di e dolor di curason aki cu nos ta crece, cambia y evoluciona, mientras nos ta haya e fortalesa interior y resistencia cu nos no tabata sa cu nos tabatin.
E Amor Incondicional
Despues cu nos a recupera for di e dolor di curason di e amor intenso y nos a cuminsa sana y cultiva amor propio, e ora ey ta bin e amor inespera. Esun cu bo no a spera di conoce, esun cu bo ta sinti cu no ta pas cu bo, pero alabes ta sinti corecto. No tin wega –mindgames– y ora bo ta cu nan bo ta djis sinti cu bo ta na cas. Bo ta brasa tur loke nan ta, tur nan imperfeccionnan y tur nan diferencianan. Bo ta sinti mas bo mes cu nan cu nunca antes, y boso ta constantemente inspira otro pa ta e miho version di boso mes. Ora boso topa cu un obstaculo of un reto den e relacion, boso ta traha hunto pa supera esaki, pasobra boso tur dos ta compromete na boso futuro. Esaki ta e amor incondicional cu ta marca e cuminsamento di pa semper, y bo ta gradici universo tur dia pa a trece nan den bo mundo.
13 les cu nos por saca afor di e teoria aki:
1. Idealisa un otro persona no ta basa riba realidad
2. Identidad propio ta crucial
3. Amor no semper ta facil pa distingui di apego
4. Reconoce bo patronchinan ta esencial
5. Vulnerabilidad ta algo valioso
6. Laga bay hopi bes ta necesario
7. E amor cu nunca a premira kisas ta esun di mas puro
8. Aceptacion ta e yabi
9. Crecemento ta un biahe comparti
10. Amor ta un sintimento di sinti bo na cas
11. Comunicacion ta importante
12. Confia den e proceso
13. Amor continuamente ta evoluciona
Texto: Sabrina Sonensein
