Desde inicio di Pay.aw su desaroyo na 2019, Myrienne Figaroa ta forma parti di e team como Sales Lead. E oportunidad pa ta parti di e desaroyo tecnologico na Aruba, cu un compania local tabata algo unico. Na mes momento e tabata sa e importancia di modernisa e infrastructura di pago, cual na su turno ta habri caminda pa modernisacion di comercio local, cu por tin un impacto grandi pa Aruba. Myrienne su pasion pa tecnologia a inspir’e pa ehecuta e tech camp “GRIT” durante e periodo cu e tabata den directiva di WOW Aruba, cu e speransa di cende un chispa den e hubentud pa sigui un carera den tecnologia.
Myrienne Figaroa ta un persona cu continuamente ta traha riba su desaroyo personal y profesional, y ta considera trabou un parti importante di su bida. E ta kere den traha cu proposito y ta haya importante pa por identifica cu e proposito di e compania y servicio. Di e forma aki e por duna tur di su banda pa contribui na e desaroyo di e servicio y compania, pero tambe na e satisfaccion di e cliente. Como empleado e ta considera su mes manera un business card di e compania, sin importa e producto of servicio, esey ta motiv’e pa semper asisti unda cu e por. Myrienne ta pone hopi importancia riba ta responsabel, entrega trabou di calidad halto y traha riba e meta comun, compartiendo conocemento.
E cambionan cu e ta mirando den comportacion di e consumidornan rond di pagonan digital ta cu nan ta hopi mas dispuesto pa haci uzo y tin mas confiansa den metodonan di pago digital. Nan ta spera pago instantaneo, cumplimento inmediato di servicio y pa complementa esaki, servicio na cliente 24/7. Transaccionnan ta tuma luga na tur momento di dia. Den caso di Pay.aw, por wak e cambio den e cantidad di personanan cu ta haci uzo di dje, e cantidad di transaccionnan cu nan ta haci y cuanto placa nan ta laga den nan wallet te ora cu nan haci nan proximo transaccion. Pago digital a habri porta pa otro tipo di servicio, manera “Buy Now Pay Later” y “Peer-to-Peer”.
Myrienne Figaroa ta splica den Focus Digital Magazine di e luna aki, cua ta e transformacion mas significante cu tecnologia financiero ta treciendo pa negoshinan local y con e ta defini e futuro di ‘fintech’ na Aruba. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
