Aruba Trade & Industry Association (ATIA) tin e placer di anuncia e nombramento di Sra. Derchlien G. Dijkhoff como Directora di e asociacion, efectivo 1 di november 2026.
“Nos ta hopi contento di yama Sra. Dijkhoff bon bini como Directora di ATIA,” Sr. Danilo Werleman, Presidente di e Hunta di Comisario di ATIA, a bisa. “Su experiencia den maneho strategico, relacion cu stakeholders y colaboracion entre sector publico y priva ta exactamente loke ATIA mester den e siguiente fase di su desaroyo. Nos tin tur confiansa cu bou di su liderazgo, ATIA lo sigui crece como un bos fuerte y representativo pa e comunidad empresarial di Aruba.”
Sra. Dijkhoff ta trece mas cu 15 aña di experiencia den maneho strategico di programa y proyecto, relacion cu stakeholders, marketing, comunicacion, evento y desaroyo organisacional den e region Caribe. Durante su carera, el a dirigi team multidisciplinario, maneha presupuesto, desaroya iniciativanan strategico y construi colaboracion entre e sector publico y priva.
Desde 2023, Sra. Dijkhoff ta ocupa e posicion di Senior Product Specialist na Aruba Tourism Authority (A.T.A.), unda e ta contribui na programanan strategico enfoca riba fortalecemento di e ecosistema turistico y social di Aruba. Su responsabilidadnan ta inclui planificacion strategico, maneho di proyecto y presupuesto, relacion cu stakeholders y prensa.
Prome cu el a drenta A.T.A., Sra. Dijkhoff a ocupa posicionnan di liderazgo como Marketing Manager na Tourism Corporation Bonaire y Director Project & Events Management na UNICUS. E posicionnan aki a dun’e un base solido den marketing, comunicacion, evento internacional, desaroyo di sponsorship y project management.
Ademas di su trayectoria profesional, Sra. Dijkhoff tin un fuerte compromiso cu desaroyo di comunidad y empresario. El a ocupa diferente posicion di liderazgo den Kiwanis International, tanto na Bonaire como na Aruba, incluyendo dos termino consecutivo como Presidente. E tambe a contribui como Leadership Coach na Qredits Bonaire, guiando startups y empresarionan den desaroyo di nan negoshi y nan capacidad di liderazgo. Su envolvimento ta enfoca riba desaroyo di hubentud, participacion comunitario, liderazgo organisatorio y apoyo na empresarionan.
Como Directora, Sra. Dijkhoff lo traha hunto cu e Hunta di Comisario di ATIA, miembronan, partnernan empresarial, gobierno y otro stakeholdernan pa sigui fortalece e rol di ATIA como bos representativo di e comunidad empresarial, y pa avansa iniciativanan cu ta contribui na un economia fuerte, competitivo y sostenibel.
Prome prioridadnan como Directora
“Mi ta sumamente honra di asumi e rol aki y mi ta agradecido na e Hunta di Comisario di ATIA pa e confiansa cu nan a pone den mi,” Sra. Dijkhoff a bisa. “Durante mi prome lunanan, mi enfoke lo ta riba scucha, conoce e organisacion y su miembronan, y pone un base solido pa e añanan cu ta bin.”
Den e prome fase aki, Sra. Dijkhoff lo concentra riba e siguiente areanan. Durante e proceso di ‘onboarding’ lo tin un periodo di orientacion cu reunionnan cu e Hunta di Comisario, e personal, miembronan y partnernan, pa haya un bista completo di e operacion, e retonan y e oportunidadnan actual di ATIA. Desaroyo di un plan strategicoden colaboracion cu e Hunta di Comisario, cu metanan clave, prioridadnan defini y resultadonan midibel pa e aña venidero. Alabes fortalece e comunicacion y e relacion cu e miembronan existente, scucha nan necesidadnan y agrega mas balor na e miembresia.
“E forsa di ATIA ta den su miembronan,” Sra. Dijkhoff a agrega. “Mi ta wak dilanti pa traha man den man cu nan, cu e Hunta di Comisario y cu nos partnernan, pa hunto nos por construi un organisacion mas fuerte, mas visibel y mas relevante pa e comunidad empresarial di Aruba.”
