Miss Universe Curaçao 2026, Bianty Rojer-Gomperts, ta maestra di scol secundario, amante di ciencia y un persona cu ta kere firmemente den e poder di educacion y desaroyo personal. E ta considera su mes un hoben humilde, soñado, alegre, perseverante y cu actualmente tin e honor di representa Corsou na e certamen di Miss Universe 2026 na Puerto Rico. E titulo cu Bianty a logra no ta solamente un soño, promesa y responsabilidad, sino tambe tin un historia su tras. Su caminda pa e corona a cuminsa hopi prome cu 26 di juli 2026. Na 2023 el a resulta prome finalista, pero no a renuncia na su soño.
Famia ta e base di su bida. El a crece den un famia grandi y uni, cu su wela como un di e pilarnan principal. Nan amor y sosten semper a nifica hopi p’e, specialmente durante su trayectoria pa e corona di Miss Corsou. Un trayectoria di cual e tabata consciente cu e titulo cu e tabata aspirando na dje lo exigi tempo, trabou, disciplina y sacrificio. P’esey cu nan apoyo, el a prepara su mes no solamente fisicamente, sino mental y emocionalmente tambe. Apesar cu e sacricifio fisico ta esencial den e preparacion di un reina di beyesa, Bianty ta kere cu nos mente semper mester ta na paz y conecta cu nos alma y curason.
Bianty na 2021 a gradua na University of Cincinnati na Merca, cu biokimica como su specialisacion principal y biologia como specialisacion secundario. Ciencia semper tabata un parti importante di su bida, y actualmente e ta disfruta duna les di biologia, ademas di yuda alumnonan cu kimica y matematica. Su pasion pa traha cu hoben ta bini paso e ta consciente cu educacion ta mucho mas cu loke e hoben ta skirbi den un buki. P’e educacion ta tambe, trata di yuda un hoben descubri su capacidad, fortalece su confiansa y lag’e mira posibilidadnan den su mes cu kisas e mes no a descubri. Cu firmesa e por afirma cu definitivamente educacion ta un di su propositonan den bida.
Ora Bianty a wordo corona como Miss Curaçao 2026, el a permiti su mes para un momento y realmente sinti tur loke e victoria aki tabata nifica. E tabata consciente di tur e trabou, crecemento y perseverancia cu a trece te na e punto ey. E no a mira e corona como algo cu simplemente a yega cerca dje; el a ricibi’e cu gratitud y cu pleno consenshi di e responsabilidad cu ta bini cu ne. Desde e momento ey, hopi cos a cambia, pero e cambio di mas grandi a sosode den su mes. Awe e tin mas confiansa den su habilidadnan y di e poder y impacto di su bos.
Representa Corsou internacionalmente ta un soño y un honor inmenso. Interesantemente, Bianty no a crece cu e soño specifico di bira reina. Pero su mama semper tabata bis’e cu un dia e lo haci algo grandi y laga un marca den historia di Corsou. Awe, e palabranan ey tin un nificacion ainda mas profundo. Pa representa su pais ta mas cu bisa “Kòrsou” riba un tarima internacional. E ta nifica carga su identidad como yiu di Corsou den cada entrevista, cada desfile, cada combersacion y cada luga cu e bay. Ta duna e hendenan un tiki di nan cultura, nan calor, nan historia y nan manera di ta.
E deseo di Bianty Rojer-Gomperts pa haci un diferencia ta tambe na ‘rais’ di su proyecto social, Love Remembers. E proyecto aki no a nace for di un logro. El a nace for di amor, door di un experencia profundamente personal. Su mama tin Alzheimer y e ta un di su cuidadonan. Na principio, Bianty tabata puntra su mes: “Dicon nos?” Ta un pregunta cu probablemente hopi hende ta haci ora bida pone nan dilanti di un situacion cu nan no a scoge. Pero cu tempo, el a cuminsa haci un otro pregunta: “Kico mi por haci cu loke mi ta pasando aden pa yuda un otro hende?”. E pregunta ey a cambia su perspectiva. El a cuminsa transforma dolor den proposito.
Miss Universe Curaçao 2026 su inspiracion di mas grandi ta su mama. Alzheimer a cambia hopi cos den nan relacion, pero e no por a kita e amor entre ambos, ni kita tur loke su mama a siñ’e. Ora Bianty wak su mes den spiel, e ta mira un parti di su mama den dje. E ta mira su forsa, su amor y tur loke el a inverti den dje. Bianty Rojer-Gomperts ta ilustra e portada di Focus Digital Magazine di october y ta comparti detayenan interesante den e revista, cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
