Representa Boneiro a yuda Caroline Porras mira cu su trayecto ta conecta cu algo mas grandi cu su mes. E ta carga e nomber di su isla, e sosten di su comunidad y e speransa di e hendenan cu ta kere den dje. Esaki a haci’e sinti mas responsabilidad, pero tambe mas gratitud. Miss Universe Bonaire 2026 a siña aprecia ainda mas su origen, su idioma y e manera con su hendenan por sostene otro. Boneiro por ta chikito, pero nan tin talento, cultura y storia cu ta merece un luga riba un escenario mundial.

Caroline Porras su prome experiencia den mundo di certamen di beyesa tabata na 2022. Su amigonan a anim’e pa participa pa e descubri un otro banda di su mes y duna su mes e oportunidad pa purba algo nobo. Caroline a termina como prome finalista y despues el a ricibi e titulo di Miss Tourism 2023. E experiencia ey a trece p’e hopi crecemento personal. El a siña hopi y gana mas confiansa ademas di descubri cu e tin mas potencial di loke e mes tabata pensa. Esaki a inspir’e pa purba atrobe. Caroline tabata kier mira te unda e por yega si e sigui traha riba su mes. Miss Universe Bonaire tabata un oportunidad pa sigui crece y pa uza loke el a siña pa inspira otro hende.

Durante Caroline su bishitanan na scol cu su proyecto “Celebrate Your Potential”, el a realisa cu su titulo ta dun’e un oportunidad pa haci algo di balor pa otro persona. Para dilant’i e muchanan, comparti su experiencia y anima nan pa kere den nan mes ta nifica hopi.Na un nivel mas personal, su yiu muhe ta haci e trayecto aki ainda mas special. E tin apenas un aña y probablemente e no lo corda e momentonan aki, pero un dia nan lo por wak e potretnan hunto y Caroline lo por bisa: “Esaki ta mama, representando Boneiro na Miss Universe”. E ta imagina e momento cu e ta riba esenario y su yiu den publico. Esaki lo ta un momento cu e lo carga den su curason pa semper.

Carolina ta bisa e aspectonan di cultura di Boneiro cu e ta entusiasma pa demostra riba e plataforma di Miss Universe: “Mi ta orguyoso di nos Papiamentu, nos hospitalidad y e calor di nos hendenan. Mi kier pa hende conoce Boneiru pa su bunitesa natural, pero tambe pa e comunidad y e cultura cu ta duna nos isla su identidad. Mi ta entusiasma pa mustra con algo cu ta forma parti di nos paisahe y historia por bira un expresion di creatividad y orguyo.

 

Carolina Porras ta comparti den Focus Digital Magazine di e luna aki loke lo nifica p’e pa trece Bonaire su prome corona di Miss Universe. Ademas di ta un logro cu e lo kier comparti cu su famia y tur hende cu a soste’e durante e trayecto aki. E eleccion ta tuma luga diamars dia 24 di november na José Miguel Agrelot Coliseum na San Juan, Puerto Rico.

LEAVE A REPLY

Please enter your comment!
Please enter your name here