Awe nochi despues di hopi luna di preparacion finalmente Ilaijah Catalina Croes representando Dushi Carnival Group ta bay haci su presentacion grandioso riba escenario. Ilaijah tin 14 aña di edad y su color preferí ta biña y blauw, e gusta baila, modela y scucha musica.
E idea a surgi pa Ilaijah participa pa Reina Hubenil despues di su tercer participacion den e show “Ser Bunita Ser Bo Mes” unda el a presenta asina natural riba escenario. Manera cu a dicidi cu Ilaijah ta bay participa pa Reina Hubenil di Carnaval 65, e preparacionnan a start mesora desde mei aña pasa. Awe merdia FOCUS a hiba un combersacion cu su tanta, Irina Croes, Reina Infantil 1988, cu ta un di e personanan clave den e preparacion di su sobrina.
Segun Irina cu nan a percura pa cuminsa hopi tempran pa motibo cu Ilaijah ta special, y nan sa cu e hendenan special mester duna nan mas tempo y atencion. El a bisa cu nan tin un di e miho teamnan, manera e musica di e show pa Edseline Figaroa y Francis Tromp, e show cu e grupo di baile Chaz Models, cu ta Ilaijah su grupo di baile di semper. E show a wordo hinca den otro cu ayudo di e Team Ilaijah mes, cu ta consisti di famia y amigonan.
E costuum di Ilaijah ta den man di Andrew Curiel y su shimis ta un creacion di Ronchi de Cuba. Iliajah su soño ta birando realidad ya cu aña pasa cu el a baila pa Reina Hubenil di TOB, el a puntra su mama dicon e no por competi pa reina. Su mama e momento ey a bise pensando cu e no lo por, cu ya e ta reina di nan cas y e no mester competi, pero despues nan a realisa pakico no?
Pesey nan a cuminsa planea tempran tur loke lo ser presenta awe nochi y nan lo tin cu warda con Ilaijah mes lo reacciona, aunke e tin experiencia riba stage. Irina a finalisa bisando cu esaki ta e bunita di e hendenan special, pasobra bo no sa nunca ki bo por ‘expect’ di nan. “Pero nos ta hopi contento cu Ilaijah ta riba stage, kibrando barera y ta simplemente su mes y mas cu tur cos e ta ‘having a lot of fun’ y esey ta nos prome meta cu ne”.
Ilaijah su lema ta “Sea Bunita Sea Bo Mes”, y su soño ta mas inclusion na Aruba. No solamente den actividadnan cultural pero tambe pa habri wowo di nos tur pa por crea mas posibilidad pa hendenan special aki na Aruba tanto na scol, trabou y oportunidadnan pa sigui crece. No solamente den educacion pero tambe nan hobbynan y loke nan ta bon den dje.
