Chicago ta e ciudad di mas grandi na Illinois y ta pertenece den top 3 di ciudadnan di mas grandi na Merca. Un ciudad bon bishita, cas di Chicago Cubs y hopi gusta pa nos Arubianonan. Conoci como un ‘business disctrict’ y cu un economia stabiel, Chicago tin hopi pa ofrece. Un ciudad rico na cultura, historia, arte como tambe gastronomia.

The Bean (Cloud Gate)

Conoci como e atraccion di mas bishita na Chicago, e asina yama ‘The Bean’, cu originalmente yama ‘The Cloud Gate’ ta situa na Millemium Park y a wordo inaugura na 2004. Awendia e ta e arte mas fotografia na Chicago y sigur un di e atraccionnan mas gusta y conoci. Debi na su forma y structura, como tambe material di aluminium, e ta e mihor manera pa cubri e ‘skyline’ di Chicago den un solo potret.

Gastronomia

Tur hende cu a bishita Chicago sa cu nan ta conoci pa nan ‘deep-dish pizza’, hotdogs como tambe e pan cu carni Italiano. Algo cu sigur bo no por keda sin come na Chicago ta e ‘Garrett Mix’. Illinois su snack oficial ta popcorn. Garrett Mix ta un mescla di popcorn cu a wordo patenta y protega. Un combinacion di popcorn di caramel cu popcorn di keshi. Niun biahe pa Chicago no lo ta completo, sin purba e mix autentico aki.

Cultura & Historia

Chicago ta conoci como un ciudad cu a produci hopi cancion grandi den genero di Gospel, Jazz y Soul. Un ciudad cu ta inverti hopi den arte, tur locual ta baile, canto y musica. Bo no por keda sin bishita ‘The Art Insitute Of Chicago’, un museo mundialmente conoci y mas bishita y carga cu e piesanan antiguo. Si bo tin gana di conoce Chicago na un manera clasico, anto bo mester core ariba e “L”. Sin lubida riba e crucero ‘First Lady’, cu ta laga bo wak Chicago for di un otro angulo, cubriendo asina mas di 50 edificio cu arkitectura sin igual. 

Bida Nocturno

E atraccion di mas grandi na Chicago ta cualkier wega di Chicago Cubs. Tur hende ta sali riba caya sea ta prome, durante of despues di wega. Semper tin algo pa haci na Chicago, ya cu e ta conoci pa tin e mihor clubnan di comedia, steakhouse y e barnan cu cocktails exotico. Division Street ta e ‘strip’ di mas bishita anochi. Durante dia e ta un shopping area, pero anochi ta comberti su mes di e ‘hottest’ strip pa ‘bar-hopping’. Rush Street ta un otro strip conoci pa e mihor clubnan nocturno. Chicago tambe ta conoci pa e shownan musical den e legendario ‘Chicago Theater’.

Stacey Banfield

“Chicago ta un ciudad grandi, hopi bunita y cu hopi pa ofrece den e area culinario como tambe entretenimento. Un di e miho restaurantnan cu mi a yega di experencia ta na Chicago; Girl & The Goat, ofreciendo un ambiente hopi cozy y un family style menu cu e platonan di e sabornan unico y cu e presentacionnan super creativo. E “wood grilled brocolli” sin duda ta un MUST! Como cu mi ta sumamente fascina cu e ciudadnan grandi, semper mi travel tip di mas importante ta, pa conoce e ciudad door di cana mas cu bo por y experencia tur locual e tin pa ofrece up close y personal. Bo ta experencia asina hopi mas canando, en bes di tuma otro medio di transportacion. Haciendo esaki na Chicago, mi a explora e area di The Magnificant Mile, Michigan Avenue Bridge, The Bean, Millenium Park y mucho mas.”

LEAVE A REPLY

Please enter your comment!
Please enter your name here