Skirbi pa Keyla Reeder

E comienso di un estilo di bida

Estilo di bida ta mucho mas cu simplemente kico nos ta scog’e pa come, bisti of haci. E ta defini como un manera of habito di biba, cu ta expresa sea un persona su manera di ta of con un persona ta scog’e pa pasa su tempo liber.

 

Na Aruba nos ta conoci pa ta un ‘One Happy Island’ cual ta refleha tambe den nos manera di biba y comparti momento cu otro. Un estilo di bida ta forma of influencia pa medio di cultura, religion, area demografico, famia y hasta tecnologia. Pa Aruba esaki ta hopi visibel, specialmente cu e fenomeno di globalisacion. Nos ta bibando den un era competitivo, unda e salud y bienestar di nos mes y nos futuro generacion ta na riesgo a base di nos estilo di bida. Nos estilo di bida por ta e punto di “make it or break it” cuminsando cu nos escogencianan y manera di pensa. Mayoria biaha esaki por tin consecuencia negativo, problema cronico y di salud, manera; diabetes, sucu, stress y presion halto. Desde e introduccion di ‘fast food chains’ y un crecemento den e sector di turismo, a expone Aruba na diferente cultura, norma, balor y tambe un cambio di estilo di bida.

Un dicho popular, hopi uza rond di mundo, ta bisa cu bo por scoge 2 di entre otro: tin un bida social activo, drumi suficiente (8 ora) y ta exitoso. En realidad tur esaki por ta alcansabel dependiendo di e escogencianan cu bo ta haci y e estilo di bida cu bo a crea pa bo mes.

 

Entre aña 2000 pa 2010 e motibo principal di mayoria morto tabata pa consecuencia di problema cardiovascular, cu ta inclui problema di curason, pulmon, diabetes, obesidad y tambe problema celebral. Tur esaki ta refleha riba e estilo cu nos ta scog’e pa biba cual ta inclui e siguiente habitonan:

  • Humamento entre otro di cigaria of tabaco.
  • Consumo exceso di bebida alcoholico.
  • Come cuminda cu vet, salo of sucu.
  • Falta di movecion y haci ehercicio diario.

 

Creando e estilo di bida ideal

E ta tuma un persona un averahe 21 dia pa por forma un habito, pero e ta rekeri consistencia pa por crea y forma un estilo di bida saludabel. Naturalmente salud ta na prome lugar; no solamente e salud fisico, sino tambe e salud mental, emocional y spiritual.

 

Crea un estilo di bida ideal pa bo y biba un bida mas largo y saludabel ta mas facil cu nos ta kere. Cuminsa na haci un compromiso cu bo mes, mesun cos cu bo ta haci cu otro amistad of cita importante. Un estilo di bida saludabel y feliz ta encera:

  • Dedica un minimo di 20 minuut pa dia ta medita of tuma un momento di silencio pa bo mes.
  • Hacie un prioridad pa drumi minimo 8 ora pa dia y evita di ta riba bo celular of cualkier producto electronico 2 ora prome cu bo drumi.
  • Reemplasa snacks cu ta consisti di sucu, salo of vet cu un alternativa saludabel manera fruta of berdura.
  • Prepara bo cuminda un dia anterior pa evita di come ‘fast food’ of cuminda no saludabel.
  • Hacie un habito pa nota of pensa riba 3 cos cu bo ta agradecido p’e tur dia prome cu bo bay drumi y ora cu bo lanta.
  • Evita multifuncional: balansa bo dia y evita stress of ‘burnouts’.
  • Balansa bo bida laboral y bo bida personal.
  • Biba den e presente: evita di wanta rencor of memoria negativo di e pasado.
  • Duna bek den bo tempo liber: Psicologo Mark Snyder a conclui cu persona nan cu ta haci trabou boluntario tin un halto auto-estima, bienestar psicologico y ta mas feliz.

Por ultimo, cuida di bo mes prome cu bo por take care di un otro: prome cu bo por brinda sosten of ayudo na un otro e ta importante cu bo ta den balans y den un estado di trankilidad.

LEAVE A REPLY

Please enter your comment!
Please enter your name here