Skirbi pa Keyla Reeder

Mayoria di e personanan exitoso tin algo en comun: Nan ta crea rutina diario, cu ta e clave pa yuda nan biba un bida largo, exitoso y liber di stress. Exito hopi biaha sa trece stress cu ne den e areanan financiero y economico, emocional, personal, familiar y den e fasenan fisico mas despues. Algun di e habitonan di persona exitoso, cu ta biba un bida largo y sin stress ta encera: lanta trempan tur dia pa ‘seize the day’, elimina distraccion y nan ta percura pa cuida nan salud mental, emocional y fisico y haci esaki e prioridad di mas importante.

Pa un bida saludabel y largo no ta solamente importante pa mantene nos curpa fisico den condicion, sino tambe nos salud emocional y mental. Pa biba un bida largo y saludabel den tur aspecto, ta mas facil di loke nos ta pensa. Bo tabata sa cu e prome 10 minuutnan despues cu bo lanta mainta, ta e momento mas influencial y crucial cu lo defini ful bo dia completo? Pa biba un bida saludabel, exitoso y largo ta rekeri cu bo lo mester cuminsa un rutina diario, cuminsando desde e momento cu bo lanta, t’e cu ora bo bay drumi anochi.

 

 

Alimentando Bo Mente

Dedica e prome minuutnan, ora cu bo spierta mainta pa bo mes. Ta importante pa tuma 5 pa 10 minuut den silencio, riba bo cama y medita sin cu bo ta pensa riba loke bo mester ‘get done’ pa e dia ey. Hopi biaha nos tin e tendencia di lanta mainta den pura y e prome pensamento ta: Kico mester haci e dia ey? Entre otro na trabou, bida familiar, compromiso y obligacion. Esaki por crea un estado mental di stress, cu lo por afecta bo dia completo y evita cu bo ta traha productivo y eficiente. E prome pensamentonan ora bo lanta y prome cu bo bay drumi, ta con bo lo sinti y pensa.

Un forma pa cuminsa haci esaki ta door di practica ‘mindfulness meditations’, ripiti afirmacion of mantras, manera cuminsando cu: “Ami ta…”, of si bo ta un persona spiritual of religioso, por haci esaki den forma di oracion. Bo lo ripara cu pa medio di alimenta bo mente cu e cosnan positivo y evita di hinca bo mes den un estado di stress, bo lo sinti menos cansa y cu menos efecto negativo cu stress ta trece cu ne. Bo tabata sa, cu stress ta afecta nos sistema inmunologico, cual ta baha nos resistencia pa e malesanan contagioso? P’esey ta importante pa cuminsa na nos salud mental, si nos kier biba un bida largo y saludabel.

 

Cuido Fisico

Den e mundo moderno di tecnologia y cu tur cos moviendo asina liher, mayoria biaha nos ta opta pa no tuma tempo pa haci ehercicio algun ora pa dia, pa mantene nos curpa den movecion. Manteniendo e curpa den movecion ta cuminsa for di e momento cu nos ta baha for di nos cama. Tuma algun minuut mainta pa bo stretch tur parti di bo curpa of jog pa 30 – 45 minuut.

Bo tabata sa, cu ora bo ta haci movecion y ehercicio, esaki ta produci endorfina y otro kimico den nos celebro, cu ta responsabel pa e sentimento di felicidad y bon humor?

Naturalmente e salud fisico no ta solamente haci ehericio y mantene e curpa den condicion, sino tambe kico nos ta opta pa alimenta nos mes cu ne. Awendia mayoria cuminda y bebida ta contene hopi sucu of color, sabor y ingrediente artificial. Cuminsa bo dia cu un bon desayuno y termina bo dia comiendo menos.Cuminda pisa of vet/hasa, pa evita cu bo no por drumi bon. Loke nos ta come y bebe tambe ta afecta cu nos ta sinti emocionalmente y ficisicamente. Hopi malesa di curason, higra of parti interno y externo di e curpa, ta bin pa motibo di kico nos ta scog’e pa alimenta nos mes. Un otro factor importante pa tene cuenta cu ne ta, nos consumo di alcohol y nicotina, cu por tin hopi efecto negativo pa bida largo.

 

Algun secreto pa yuda bo cultiva un estilo di bida liber di stress

1. Percura pa drumi por lo menos 8 ora pa dia. Paga bo telefon y tur aparato electronico of pone esaki riba silencio. Evita di ta riba bo telefon e ultimo 2 oranan, prome cu bo drumi.

 

 

2. Pidi ayudo ora bo mester. Ningun persona ta un superheroe cu por haci tur cos na e mesun momento. Pidi ayudo of asistencia y evita di drenta den un estado di stress, panico, ansiedad of rabia.

 

3. Mantene un schedule y inclui ora pa bo relaha, descansa y tuma ‘breaks’ durante bo dia. Haci bo mes un prioridad: esaki ta nifica cu ora bo traha un cita pa bo mes, mantene bo mes na esaki y no cancela e compromisonan, cu bo a haci cu bo mes pa e dia en cuestion.

 

4. Sea conforme cu loke ta. E realidad ta cu tin solamente 24 ora den un dia y 7 dia pa siman. Pues sea realistico cu bo ora y ta conforme cu e circumstancianan di bida, cu no ta den bo poder pa cambia.

 

5. Tuma tempo pa slow down y reflexiona. Haci un inventario diario y evalua kico bo ta sinti emocionalmente, fisicamente of spiritualmente. Pa medio di reflexion y haci un inventario personal, bo lo por saca afo kico ta e cosnan cu bo ta haci of pensa, cu ta contribui na sentimento di stress, ansiedad, depresion of sentimento negativo.

 

6. Siña pordona y no wanta rencor. Un di e gurunan mas popular; Oprah Winfrey, ta conta cu, pa bo por biba un bida feliz y exitoso ta rekeri pa bo siña pordona otro y bo mes. Esaki ta crea e ‘Aha! Moment’ cu lo laga bo sinti mas liber, calmo y feliz; reduciendo stress cu ta trece mas malesa contagioso pa bida largo.

LEAVE A REPLY

Please enter your comment!
Please enter your name here