Cuido Personal ‘self-care’ ta un aspecto sumamente importante den cualkier persona su bida diario. Hopi biaha nos ta neglisha esaki of ta traha diferente pretexto, pakico esaki no ta e prome cos riba nos ‘to-do list’. E realidad ta, cu door di pospone tempo pa nos mes pa motibo di stress y un schedule yen, esaki ta conduci pa duna bo mas stress y no ta mehora e situacion.

Cuido personal ta wordo defini como e actividad- of practicanan cu nos ta eherce, pa reduci stress of ansiedad y mehora nos salud. No ta trata solamente cu e ta un importancia, sino un arte, cu bo tambe por siña domina.

 

Pakico bo mester cuminsa practica cuido personal?

Actualmente nos ta bibando den un cultura di ta constantemente druk of bezig cu algo; sea trabou of e demandanan di bida. Pa e motibo ey, mayoria biaha e cosnan di mas chikito, manera; prepara un plato saludabel, sali cu amistad, bay gym of simplemente relaha nos mes, ta sinti manera un luho. Cuido personal of self-care ta algo crucial, cu por yuda bo maneha bo dia mas eficiente y tambe reduci e efectonan negativo, manera; stress, ansiedad, nervio, depresion y tambe ‘burn outs’.

Cuminsa cu e mas basico

Segun e estudionan, cuido personal ta un elemento cu ta presente den tur persona exitoso su bida. Ta existi diferente forma pa cuida bo mes: bo salud fisico, emocional, mental, intelectual y social. Tur cinco area ta importante pa practica y eherce pa un mihor resultado. Den e herarkia di necesidad di Maslow, e prome necesidad di mas importante y esencial pa sobrevivi ta, pa satisface e necesidadnan fisiologico. Pa medio di practica e actividadnan cu ta mehora bo salud fisico, e.o; haci ehercicio, yoga, baile, of come saludabel, bo ta subi bo autoestima y mehora bo salud. Cuido personal na e nivel fisico tambe ta inclui bo relacionnan intimo y sexual. Pues, cuido personal por simplemente cuminsa cu un bon dieet of snack saludabel durante bo ora di trabou of sea na cas, bishita e gym y tambe haci algun movecion fisico pa reduci stress. E no ta recomendabel pa ora bo tin ‘deadlines’ of un schedule hopi druk, pa skip lunch breaks of keda sin come, simplemente paso bo kier caba tur bo trabou prome. E efecto di esaki ta inclui, cu bo lo traha riba e fuelnan reserva di bo curpa y lo cuminsa sinti malo te na e punto, cu bo no por concentra of traha optimalmente.

Con pa practica cuido personal y su beneficionan.

E lista di manera con pa practica cuido personal ta hopi extenso. E ta keda na cada persona kico nan ta scoge pa haci pa cuida nan mes of ‘reward’ nan despues di un dia largo di trabou y stress. Algun idea y tips di con bo por practica cuido personal:

  1. Traha tempo den bo rutina diario pa come (saludabel) y haci ehercicio, hasta si bo ta sinti cu bo no tin tempo pa esaki.
    Pa bo keda den coordinacion cu bo schedule, plania pa haci ehercicio of bay gym, segun e tempo cu bo tin of por traha. Esaki por varia di 5 minuut te cu 1 ora pa dia.
  2. Tuma ‘breaks’ chikito den bo rutina di trabou.

Tuma ‘breaks’ ta importante pa por focus miho y kisas yega na e solucionnan mas creativo pa un problema di trabou, of problema personal cu bo tin. ‘Breaks’ por inclui: un paseo pafor, wak television of lesa un rato, tuma un baño, of medita. Actualmente un pasa tempo popular den adulto a bira; ‘adult coloring books’. Pa medio di kleur, bo ta tuma un break di bo rutina y reduci bo nivelnan di stress na un forma sano, cu sigur tin hopi beneficio tambe.

  1. Practica y eherce bo higiena emocional.

Mesun importante ta pa bo frega bo djente y floss, como mesun normal esaki ta den bo rutina diario, ta importante pa practica y eherce bo higiena emocional, por ehempel; tuma nota di kico bo ta sintiendo e momento aki of durante un situacion dificil y nota kico ta e pensamento tras di esaki. E psicologonan a verifica, cu un forma eficiente pa practica cuido personal na e nivel emocional ta, pa bishita un terapista of pa medio di tene un diario ‘journal’. Meditacion tambe a cuminsa bira un forma popular, combina cu un diario pa expresa con bo ta sinti y pone bo sentimentonan den palabra riba papel.

  1. Protega bo schedule

Esaki ta encera practica y siña bisa ‘no’ ora ta necesario, por ehempel; ora bo schedule ta mucho yen y un persona ta pidi pa un fabor of pa caba cu un trabou adicional. Ta importante pa siña bisa no na un persona of trabou, specialmente si e ta nifica cu e lo tuma mas tempo for di bo y kisas laga bo sinti mas stress of ‘burn out’. Un idea pa haci esaki mas facil ta pa comete bo mes na solamente 4 of 5 trabou so pa dia y recorda bo mes, cu loke bo no logra caba awe, bo por caba e dia siguiente. Importante ta pa recorda cu e persona di mas importante ta ABO mes, pues practica esaki manera bo mantra y prioridad.

LEAVE A REPLY

Please enter your comment!
Please enter your name here