Scirbi pa: Keyla Reeder E rol di un tata ta uno sumamente importante y clave den e bida di cualkier mucha. Esaki no ta conta solamente riba e desaroyo personal, sino tambe e parti emocional, psicologico y social. E impacto aki tin hopi beneficio tanto pa e mama como tambe e mucha. Pa varios decada caba, e cientifico- y investigacionnan a impone, cu e figura matero ta esun di mas importante y esencial den e desaroyo propio di un mucha. Den e ultimo añanan e focus a cambia riba e tatanan, pa mustra con ambos mayor, esta mama y tata, ta igual di importante y ki impacto esaki tin. Un estudio a confirma cu e efectonan emocional, manera depresion, angustia, rabia y abuso di substancia, manera; droga alcohol, ta resulta mas ora un mucha no tin un figura paterno den su bida, den comparacion cu ora e figura materno ta ausente. E figura di un tata, den cualkier famia, ta uno cu ta forma structura y caracteristica. Semper a mira e tatanan como e figura cu ta impone disciplina y regla den un cas. Den otro palabra, e balans entre un mama y tata ta esencial den bida di un mucha. Por ehempel e ausencia di un tata den bida di un mucha homber por resulta, cu e mucha homber no tin un figura pa mira como un ‘role model’ of dun’e sosten y guia den e periodo di crecemento y pubertad. Esaki por trece hopi consecuencia cu ne, unda hopi biaha e mama su so, no por soluciona. Awendia un gran parti di famia ta consisti di mama soltera, di cual e figura paterno of tata biologico di e mucha ta ausente. Interesante pa sa ta, cu segun un estudio haci, unda ta compara e efectonan riba e muchanan cu un relacion cu nan tata y esnan cu nan tata ta emocional y/of fisicamente ausente, por tin como consecuencia:

  1. Isolacion y autoestima pober.
  2. Ansiedad y depresion.
  3. Mas chens pa cay cera of haya problema cu husticia.
  4. Falta di seguridad y confiansa.
  5. Cerca e mucha muhernan: mas chens pa sali na estado of drenta relacion instabiel cu por envolvi abuso verbal, domestico of sexual.
  6. Problema interpersonal y social.
  7. Problema mental y di comportacion.

Un tata ta duna un mucha e oportunidad pa desaroya su mes te na su maximo potencial. Esaki ta crea un laso estrecho, cu por hasta yuda soluciona problema social, manera; divorcio, abuso domestico, verbal y delincuencia.

E siguiente testimonionan ta di tata cu ta comparti nan experiencia y kico ta nifica pa ta un tata.

“Ta tata ta nifica pa mi responsabilidad. A pesar cu mi yiu no ta mi yiu biologico, mi a cri’e, sosten’e y stim’e manera e ta mi propio sanger. Mi a haci e compromiso cu mi casa, pa ta responsabel pa su yiu como un tata y trat’e manera mi mesun yiu. Loke ami ta haci diferente encuanto con mi ta lanta mi yiu ta, siñ’e cosnan cu kisas su mama no sa haci, manera; con pa core y drecha un bicicleta, traha cashi y hopi cos mas. E decision cu mi a tuma pa ta un tata di un yiu, cu mi ta considera mi yiu propio, cu mi a mira crece, cana, yora y papia, ta e mihor decision cu mi por a tuma den mi bida y awe mi ta agradecido pa esey y hopi mas”. Na e edad di 10 aña mi a perde mi tata. Den comienso di mi edad di teenager, mi tabata sinti su falta mas. Falta di tin un guia, un persona pa scucha mi, cu por a compronde mi y siña mi e cosnan di bida. E experiencia ey a motiva mi pa bira un miho tata pa mi yiu. Mi a siña con importante ta, pa tin un figura paterno den bo bida, pa guia y siña bo autoridad y respet. Awe mi ta probecha pa pasa cada momento cu mi yiu y siñ’e norma y balor, respet pa otro y pa su mes y record’e, cu semper e por conta riba mi pa cualkier cos. Pa ta un tata, ta e trabou di mas dushi cu mi por a desea p’e.” No necesariamente bo mester ta tata biologico di un mucha, pa por agrega balor y structura na su bida. Un figura paternal por ta un omo, ruman, bisiña, primo of un persona di confiansa cu por brinda guia, siguransa y amor p’e mucha of hoben. Un tata siguramente tin su rol, cu ta indespensabel y pa medio di esaki ta crea sentimento den cada mucha cu nunca por remplas’e, ni cu placa of material.

LEAVE A REPLY

Please enter your comment!
Please enter your name here