“You can’t stop the future, You can’t rewind the past

The only way to learn the secret…is to press play.” 

Un storia di un adicto cu tin mas cu 10 aña clean, liber for di e mal vicio di droga y alcohol. Un bunita storia cu caminda tin FE y boluntad propio, bo ta logra! Ta bunita pa wak ex-adictonan scirbi y comparti nan bida, un momento scur den nan bida y por fungi sigur como un ehempel pa nos hobennan

Hallo,

Mi kier a comparti e storia storia di mi bida como adicto, mihor conoci como ‘choller’ den nos comunidad. Algo no facil pa mi bay conta pero mi ta mira un necesidad pa cu nos comunidad riba e tereno aki. Tin hopi cos ta pasando riba e pida isla chikito aki cu nos ta ignora pero si nos para keto y mira rondo di nos, nos ta wak cuanto hoben ta perdi y riba e mal caminda. E caminda di perdicion den droga y sin cu tin un hende cu por saca un man y yuda e hobennan aki cu dia y anochi ta frecuenta e famoso ‘choller-house’ nan pa alivia nan curpa of kisas dolor cu un tiki droga, e veneno maligno cu ta daña y laga bo marca pa bida largo. Awe ami tin mas cu 10 aña clean y liber di e maldicion aki. Mescos cu varios hoben canando eyfor, asina mi tambe a cuminsa.

Mi tabata tin solamente 14 aña ora cu mi a wordo introduci pa prome biaha cu marihuana. Keriendo cu e tabata dijs un sigaria sin pensa riba e efectonan cu e tabata bini cu ne ora bo huma esaki. Mi a gusta e marihuana pa su efectonan, mi tabata sintimi trankilo, den un otro vibra cu normal pues e tabata relahami basta. Asina poco poco mi a keda huma esaki te ora cu e no tabata tin niun efecto mas y a duna mi e gana pa mi busca algo otro. Ya caba mi mayornan a cuminsa preocupa paso nan tabata wak cu mi a bira adicto na e marihuana y awor kier mas, algo otro pa mi sigui riba dje. Nan a purba busca ayudo pami pero envano. Mi a wordo manda cas for di scol te ora mi recupera bek pero e recuperacion nunca no a yega, pues mi a kita for di scol. Mirando bek atras, e ta duel mi paso awe mi no tin e educacion, diploma cu mi tabata kier.

Asina e añanan tabata pasa, mi a cuminsa uza cocaina, den clubnan nocturno esaki tabata e droga cu bo por a logra haya facil, dijs placa bo tabata tin mester, cumpre den e club for di un hende y bay den baño snuif e. Den e adiccion di droga ta placa bo mester tin pa sigui cumpra bo vicio. Dado momento mi a cuminsa horta cosnan for di mi mayornan pa asina mi logra yega na mi droga, mi a cuminsa ta horta placa, sigui pa joyas y ultimo te hasta artefactonan electronico den cas. No tabata tin un dia cu mi mayornan tabata zundra, a yega asina leu na cambia e lock di cas pa mi no drenta pero asina mes mi tabata kibra bentana pa drenta cas.

Cosnan na cas a cuminsa bira pio, e confiansa pa tin mi den cas no tabata tey mas pues mi a tuma e desicion pa sali fo’i cas y busca un caminda pa bay. Sin trabou, sin placa ta dificil pa encontra algo y e poco cu bo ta gana na side-jobs tabata net pa cumpra un tiki droga pa bo por sinti bon. Asina mi a cuminsa biba den un choller-house, un alrededor no ideal pero mi tabata tin un dak ariba mi cabes pa si awa yobe of biento frieu anochi por mantene mi seco y cayente. Den e choller-house aki mi a bin sera conoci cu ‘base’. Mi a yega na injecta mi mes varios biaha cu e droga aki.

Varios biaha mi a wordo busca y saca pa mi por bay un rehab pa mi rehabilita pero ta toca un adicto propio pa dicidi esaki y kies pa un cambio, si un otro tuma e desicion, por conta cu e adicto por cay bek den e vicio y esaki ta exactamente locual cu a pasa cu mi persona. Si dado momento mi tabata sinti mi forsa, no tabata falta mucho pa mi bolbe cay. E forsamento ta mustra mescos cu bo hendenan kier deshaci cu bo. Droga ya caba ta duna bo e sentimento di ta menos cu tur otro hende, pa awor bo mester sinti cu bo mesun famia no kier bo, ta un sentimento cu mesora ta pone bo busca alivio den droga.

Riba un dia normal den choller-house, mi a wordo aserca pa un hoben mucha muher caminda el a drenta y puntra mi pa algo. E momento eynan mi no a paga tino bon riba su edad pero locual cu el a puntra mi pe tabata algo cu mi no lo por ofrece na un hoben asina y eynan ta caminda cu mi a bisa ‘wanta un rato, esaki por ta mi mesun yiu muher den futuro’.

E seconde cu mi bida a para un rato tabata e seconde cu awe a salba mi bida. E imagennan cu mi a mira mi dilanti tabata di uno cu ‘esaki no por’. Mi bida mester di un cambio, mi no por tin e futuro aki y mucho menos mi lo kier ta un ehempel asina malo y baho pa nos comunidad, pero mas aun mi no kier ta e berguensa di mi famia. Mi kier pa nan wak mi como un hende luchado y trahado, pa un hende cu lo por hiba su famia dilanti y no uno perdi den e mundo di droga.

Mi a lanta for di e bloki cu mi tabata sinta ariba dje, pasa man pa e damita y hib’e pafo cumi. Pafo mi a bise cu esaki no ta un caminda cu e mester ta y tampoco frecuenta. Esaki ta un caminda cu hamas y nunca e tin cu cana riba y purba na lubida locual cu a caba di pasa, y pa e bira bek y bay su cas, pensa riba su scol, futuro y su mayornan. E por ta un golpi duro pa su mayornan cu na un edad asina hoben e ta den e mundo baho aki. Manera mi a caba, mi a tuma mi rumbo pa SAMBA.

Ora cu un adicto kier cambia su bida, no tin ningun hende cu lo por hasi esaki pe, cu ta su mes persona. ABO como un adicto tin cu tuma bo mesun decision y ta dispuesto pa cambia. Bo tabata tin e boluntad propio pa uza e droga, e maldicion aki, awel ta e mesun e boluntad propio aki bo mester tin pa cana y bay busca bo salbacion. Si bo sinti bo forsa, bo lo cay bek y busca e droga pero si bo dicidi pa di bo mes, bo lo logra y den nomber di Cristo Hesus mi por bisa awe mi ta salba!

Mi estadia na SAMBA no tabata facil y dado momento mi a sali for di eyden, mi no tabata cla pa a laga mi adiccion y a cay bek. E droga su poder tabata mas duro cu mi boluntad pa cambia. Mi bida a bolbe bin abao, mi dianan riba caya a inicia, mi comemento malo, sin drumi, sin baña y mendiga pa poco di florin a tuma control completo. No tabata tin un momento mas dushi pami cu e momento cu e droga tabata traha den mi, un sentimiento sin palabra pa splica pero cu awe mi ta reprende y ta arepenti di a scohe e mundo aki pa varios aña.

E dia cu mi bida a cambia, e dia Bendiciona cu mas mi a anhela a yega. Ora cu bo a pensa cu Dios a lubida riba bo, ta net e momento cu mas e ta obra y ta toca bo bida. Canando riba caya sin rumbo y busca malo pa haci, mi a topa cu un señora cu a para mi dilanti y bisa mi: “Cristo Hesus stima bo”, mi a bira wak e señora aki y bise cu ‘Cristo no ta stima choller’, el a contesta mi pa tene su man y e lo mustra mi cu no mester bin bisti den seda pa Cristo stima mi, cu manera cu mi ta, cana yega, hinca rudia y pidi yudansa cu mi bida lo cambia. Awe mi por bisa cu tabata e mihor decision den mi bida.

Yegando e iglesia di e ruman den Cristo aki, mi drenta cu yen berguensa debi cu mi tabata tur sushi, hole stinki y mal bisti. Sinembargo e momento cu mi a wak unda mi tabata ta y kico tur tin rondo di mi tabata e rikesa di mas grandi na e mundo aki, mi a cana bay dilanti y hinca rudia gritando ‘Tata yuda mi, awe mi kier cambia mi bida y pa Bo tuma control dimi’. Mi no por splica bo kico a pasa, y mucho menos con pero for di e momento eynan cu mi a habri mi curason y acepta Cristo, mi bida a cambia.

Mi a sinti un hende bin brasa mi, seca mi lagrimanan y bisando mi cu awe mi ta sana, Señor a toca mi, cu na comienso mi no lo compronde su poder pero cu paso pa paso nos lo cana riba e bon caminda y cu E lo guía mi. For di eynan mi a bay un cas caminda mi por a baña, come algo y cambia mi paña. Awe mi por bisa bo cu mi tin mas cu 10 aña clean y ainda activo den mi iglesia, y unda cu mi ta fungi como orador. Mi tarea no a caba aki, mi mision ta pa yuda mas adicto recupera y sigui riba e bon caminda aki, e caminda di berdad y caminda di Cristo nos Salbador!

Un storia cu por touch nos den tur sentido di palabra, sigur un storia scirbi cu hopi trankilidad y siguransa. Nunca lubida cu e caminda di Cristo Hesus ta esun berdadero, no tin premio, joya of placa cu por iguala e Bendicion cu bo lo ricibi den Su presencia.

LEAVE A REPLY

Please enter your comment!
Please enter your name here