Un topico hot den e area di amor y relacion actual ta infidelidad. Den e mundo moderno di tecnologia, manera manda mensahe, ta birando mas dificil pa defini kico ta wordo considera como infidelidad. E relacionnan moderno no ta solamente consisti di ta monogamo mas, mas bien awendia tin diferente tipo di relacion, entre otro; poligamo/poliamoroso of relacion habri (open relationships). E barera di infidelidad ta keda entre e parehanan, cu ta scoge pa drenta den un relacion serio cu otro. Pues kico realmente ta haci un relacion duradero y saludabel, sin pone mucho limite pa ambos?

Ki ora nos ta papia di infidelidad?

Generalmente, infidelidad ta wordo defini como: Violacion di e principionan di un matrimonio of relacion tradicional, cual ta: monogamia, fidelidad sexual y compromiso. Actualmente ta hopi dificil pa duna un solo nificacion na e palabra aki, ya cu tin diferente tipo di relacion.

Awendia, diferente tipo di relacion habri of poligamo/poliamoroso den cual monogamia no ta un problema, ta birando mas y mas comun. Mientras e echo cu media social y tecnologia ta hungando un rol mas y mas grandi, poniendo asina cu e pregunta: Ki tipo di comportacion por wordo cualifica como infidelidad?, ta bira uno mas dificil pa contesta. Bo por puntra bo mes, por ehempel, si ‘online dating’ of texting cu un persona cu no ta bo pareha, of e asina yama ‘sexting’, cual ta inclui e combersacionnan explicito cu contenido sexual y intercambio di portret of video tipo pornografico, por wordo considera como infidelidad, mirando cu no tin ningun tipo di interaccion fisico. E opinionnan tocante esaki ta varia masha hopi, pues en realidad, ta hopi dificil pa duna un solo definicion.

E inicio di infidelidad den un relacion

Cada pareha ta unico den e forma cu nan ta comunica y expresa nan emocion- y pensamentonan cu otro. Idealmente na un inicio di un relacion, un persona sa kico e ta buscando den un persona y ora e haya esaki, ta yega na un acuerdo of relacion serio. Den cada relacion, ta importante pa e pareha por tin un comunicacion fuerte y habri cu otro, pa asina evita conflicto of mal comprondemento, cual mayoria biaha ta e inicio di conflicto y un ‘trigger’ pa infidelidad. Den mayoria caso e conflictonan ta existi, ora e pareha no ta comunica y ta asumi nan limitenan pa locual ta trata interaccion cu tercera persona den nan bida, e.o.; amistad, colega, familiar, etc.

Motibo dicon un pareha ta scoge pa ta infiel

E motibo dicon un persona ta scoge pa ta infiel ta varia entre cada persona. Den mayoria caso e motibo ta origina, door cu e pareha no ta comunica bon, pues ta sinti un bashi of insatisfaccion den e relacion y ta scoge pa busca un persona pa yena e bashi eynan den forma di un ‘affair’. Otro factor por ta, cu e persona tin un autoestima abou, adiccion, falta di interaccion sexual, kier scapa of laga los di algun problema of sentimento of simplemente ta haya falta di e chispa, cu tabata tin na inicio di e relacion. Interesante pa sa ta, cu no ta den tur caso di infidelidad, e pareha ta scoge pa separa of divorcia.

Den mayoria caso di infidelidad, e pareha ta scoge pa bay un tipo di terapia, pa purba yega na un acuerdo pa salba e relacion of matrimonio. Tin hasta caso di pareha, cu tin un relacion habri y ta permiti nan pareha tin relacion cu un persona di e otro of den algun caso, hasta di e mesun sexo. Pues, infidelidad no tur ora, ta algo cu ta wordo defini como un ‘marriage of relationship breaker’.

 

TIPS pa un Relacion Saludabel despues di Infidelidad

  1. Focus riba un relacion cu e mentalidad WIN-WIN, pues ambos ta gana.
  2. Sea honesto cu otro y splica mas detaya posibel, kico bo ta sinti y e motibo dicon.
  3. Nunca asumi algo cu bo no ta sigur di dje, pues no tene miedo di puntra bo pareha.
  4. No tene miedo di busca ayudo e.o. terapia como pareha, ora bo ta sinti cu boso dos no por resolve e problema.
  5. Si bo dicidi di pordona bo pareha, no keda trece e pasado dilanti.

LEAVE A REPLY

Please enter your comment!
Please enter your name here