E di tres ciudad mas grandi na Italia despues di Roma y Milan. Naples, Napoli, Neapolis, con cu bo kier pronuncia su nomber, ta keda e ciudad mas bishita den Europa, pero como tambe un di e ciudadnan di mas habita den lama Mediteraneo. Conoci pa su historia, cultura, gastronomia, pero tambe su paisahe sin igual, ta pone cu Naples ta un di e destinacionnan mas gusta. Varios celebridad, manera; Giuliana Rancic a nace na Naples y otro cu tin cas eynan. E casnan di moda manera; D&G, ta scoge Naples como un destinacion pa graba tur nan comercialnan y asina tin hopi mas pa menciona di e ciudad magico aki.

 

Capri

Si bo ta papia di Naples, bo ta papia di Capri. Un isla chikito den e bahia di Naples. Capri tin unicamente dos pueblo; Capri y Anacapri. Un isla chikito, pero cu hopi historia pa ofrece. Algo cu sigur no lo scapa bo memoria ta e famoso ‘Grotta Azzurra’. E turistanan ta bini specialmente pa presencia e Grotta Azzurra. Un grot cu un entrada chikito di menos cu 4 meter y cu por wordo drenta unicamente via boto. For di e momento cu bo drenta e grot, bo lo mira con bunita y blauw esaki ta. E color blauw ta bin na momento cu e solo dal den e lama y drenta den e grot, iluminando esaki completamente.

 

Faraglioni

Pa esnan cu gusta bay e lugarnan cu bo ta wak, sea den pelicula of den e comercialnan di moda, E Faraglioni na Capri no ta desconoci. Protegi pa UNESCO, e formacion di e 3 piedranan aki den e bahia di Capri ta aparece den e comercial di Dolce Gabana. Tres formacion di piedra yama; Stella, Mezzo y Scopolo, ta masha popular pa e turistanan, mirando cu bo por pasa door di nan cu un tour den boto.

 

Cultura & Historia

Un hende no por bishita Naples, sin cu el a pasa bishita Pompeii. Pompeii ta forma parti di e historia di Naples. Pompeii ta un otro parti di Naples, tambe protegi pa UNESCO. E ciudad Romano aki a keda sacudi pa un temblor, activando asina e volcan Vesuvius, cual su ultimo eropcion na 1979, a mata mas di 10 mil persona di cual 2300 so a wordo recupera. Un lugar sigur emocionante pa bishita, debi cu for di e 10 mil personanan cu a fayece, unicamente 2300 persona a wordo recupera, pero den e estado cu nan a wordo kima pa e lava di Vesuvius. Algo bunita pa wak ta, con conserva UNESCO tin e personan aki, pero mas bien e historia unico di Pompeii.

 

Gastronomia

Naples ta parti di Italia y cual ta e cuminda mas comi na Italia? PIZZA! Pizza ta wordo traha bo dilanti cu e ingredientenan di mas fresco. E pizza di mas conoci ta esun di Tonno, cual ta tuna of sea pisca, cu ta wordo gara fresco y drenta den e bahia na Naples. Otro cos cu sigur hopi hende no tabata sa ta, cu e famoso pasta di chuculati ‘Nutella’ crea pa Pietro Ferro ta originalmente di Naples. Conoci na Naples como e Supercrema Giandujot, awe comercialmente como Nutella, tabata e creacion unico di Pietro. Awe rond mundo nos tur ta come Nutella den tur forma of den cualkier combinacion perfecto.

 

Rudolfo & Michelle Dirksz-Hoek

“Biahamento ta nos pasion, pero mas ainda si e ta un lugar, cu a horta nos curason y esey nos por bisa di Capri. Nos a cera conoci cu Capri via di un Crucero Mediteraneo cu nos a haci y Naples tabata un di e stopnan. Nos tabata tin e opcion pa sea bishita Pompeii of Capri. For di Hulanda caba nos a haci investigacion y nos tabata sa cu Capri lo bira e lugar cu nos lo kier bishita na Naples. Un lugar turistico como tambe historico. Algo sigur impresionante tabata e Grotta Azzurra, cual pa nos tabata e ‘highlight’ di nos vakantie. E paseo den boto y pasa memey di e Faraglioni tabata romantico. Naples lo keda un destinacion cu nos lo kier bay bek, pero e biaha aki pa bishita Pompeii.”

LEAVE A REPLY

Please enter your comment!
Please enter your name here