Un di e parehanan FOCUS ta spera yegada di nan prome yiu hunto dia 18-08-2018. E noticia cu Sharissa ta na estado tabata un shock p’e, aunke cu Edgardo tabata bis´e cu e ta na estado haciendo joke, caricia y sunchi su bariga. Te dia cu el a dicidi di haci test y Sharissa su reaccion cu e resultado tabata: “Voíla… we’re expecting!”
Sharissa a experimenta un embaraso hopi difícil na comienso. E tabata sinti tur sorto di cambio na su curpa y cu sacamento practicamente tur dia. Su miho amigonan e periodo ey tabata su cama y baño. Un pregunta cu no por a falta ta tocante su ‘cravings’ y for di comienso su antoho di mas grandi tabata cualkier tipo di fruta. E mester tur dia su baki fruta y actualmente e cuminda cu e ta antoha ta e cuminda Dominicano Mangú.
Nan ta preparando pocopoco, sperando ora e lunanan ta mas cerca pa nan bay full swing. Mientrastanto nan ta haciendo algun online shopping pa e baby caba. Sharissa y Edgardo y ful e famia ta mas cu’excited’ pa ricibi e miembro nobo di famia, debi cu despues di un decada ta trece un baby bek den famia. Aunke Sharissa ta spera dia 18-08-2018 pa ta exacto, e ta bisa cu nunca sa sigur. Nan no sa ainda e sexo di e baby y pa nan esaki no ta di importancia. Si nan lo desea di sa esaki y haci un ‘reveal party’ pa nan amigonan di mas cerca y famia.
E deseo di e pareha semper ta pa haya un baby hunto y den pasado ya a revela e nombernan cu nan lo pone pa nan yiu(nan). Por lo pronto e nombernan lo keda un secreto, pero si nan por menciona cu nan tin un significacion super grandi su tras.
Fotografia: Ayrton Tromp
