“Behind all your stories is always your mother’s story, Because hers is where yours begins.”

E amor incondicional di un mama pa su yiu muher special cu ningun hende sa cu ta existi. Un embaraso hoben cu a pone un mama tuma e decision pa sacrifica ser ‘mama’ simplemente pa duna su yiu un mihor bienestar di bida. E no ta facil pa continua cu bo bida sabiendo cu bo yiu ta yama otro mama.

Mi kier a comparti mi storia cu tur bo lectornan, un storia cu tin mi alma destrosa y mi curason kibra. No ta facil pa mi por lanta y aparenta cu mi ta felis y cu tur cos ta bon den mi bida siendo cu di paden mi ta sin consuelo. Mi tin un bashi, un tristesa ta cana rond cu ne pa mas di 9 aña y cada aña cu pasa e dolor ta bira mas intenso.

Un embaraso cu a cambia mi bida por completo. Cu apenas 19 aña mi a sali na estado for di un relacion yena di problema. Durante di mi estudio na Hulanda mi a conoce un guy di origen Spaño cu mi a comparti algun aña di noviasgo cune. Mi a yega Hulanda cu mi 17 y no tabata sa mihor. Como un studiante recien yega bo ta sali, conoce hende y purba na explora mas cu bo por. A yega un momento cu den bo bista bo a conoce e guy perfecto, e homber ideal pa tin den bo bida.

Mi a logra sali for di un relacion hopi machista pero di otro banda ta parti di nan cultura. Un tremendo persona pero cu un caracter hopi dificil pa por biba cu ne. Nos relacion a dura 2 aña, mas mi no por a wanta. E resultado di e relacion a laga mi cu un embarso atras cu mi a lucha mi so y scondi pa tur hende. Mi a muda for di mi studenten stad simplemente pa hende no mira of puntra. Mi a pone mi scol un banda te ora mi embaraso pasa. Locual hopi no sa kico a pasa despues di e embaraso.

Mi tabata tin un embaraso hopi dificil cu varios complicacion. Mi a bira diabetico y tabata tin constantemente biramento di cabes cu sanger abou. Docternan a opta pa interna mi e ultimo dos lunanan mirando cu mi tabata mi so y mi embaraso lo por trece complicacion pami y mi baby pues e risico tabata halto. Docternan a bin papia cu mi y bisami cu nan a realisa varios test y ta indica cu mi baby no lo bay bin bon, e ta salud tur cos pero lo bini como uno special. Mi lo yiu lo bay bini cu down syndrome.

Na comienso mi a tuma e noticia hopi trankil debi cu ta trata di mi yiu y den mi bista e ta normal manera tur otro mucha. Mi lo bay percura pa e tin un bunita infancia y sigur lo percura pa e por tin un bon futuro. Mas y mas cu mi pensa kico mi lo hasi pa e no sinti special, mas y mas miedo mi tabata haya di por a trece mi yiu na mundo, kisas e miedo di no ta prepara. Mi a yega un punto caminda mi a puntra docter si mi yiu por bay directamente pa adopcion, el a bisami cu por pero e proceso pa adopta un yiu cu down syndrome ta uno dificil y largo pa cana. Mi pensamento a yega asina leu di puntra docter si mi tin e opcion ainda pa aborta, aki tambe el a contestami cu no debi cu mi tabata tin 7 luna caba na estado. Mi no tabata sa kico pa hasi y mucho menos con pa deal cu e situacion.

No a kedami nada otro di busca contacto cu e tata di mi baby. Despues di varios intento el a logra yega unda cu mi ta y nos a cuminsa discuti tur e posibilidadnan di nos yiu. Un cos mi a bise cu siguransa ta cu mi no kier tuma encargo di nos yiu y mi lo ta dispuesto pa hala tras di tur responsabilidad y derecho como mama. El a nenga retundamente debi cu e no por compronde con mi por pensa y kier esaki pa nos yiu. Mi a bisa cu mi no ta cla pa enfrenta mundo cu un yiu special y cu mi famianan no sa nada cu mi tabata na estado. E unico cos cu el a puntrami ta si mi ta dicidi di mi desicion paso mi lo tin marcha atras. Cu duele na mi curason, sin pensa dos biaha mi a contesta cu si.

Tur documento a wordo firma prome cu mi a duna luz. Tur derecho y voogdij a pasa over pa su tata. Carta pa sali for di Hulanda y bay biba na Spaña cu su tata a keda regla, pues nada no lo por stroba mi yiu sali for di Hulanda. Firmando e papelnan ainda mi tabata duda poco pero mi a keda bisa mi mes cu ta pa su mesun bon. E ta duro pa tuma distancia y ainda sintie move den bo curpa. E amor ta inmenso pero mes inmenso mi amor ta pa mi yiu, mes inmenso mi kier dune un mihor bida y awor ami no por dune esey.

Mi a hiba un parto hopi doloroso, pero mas dolor aun ta di entrega mi yiu na su tata y nunca mas di por bise cu mi ta su mama y cu mi stime. Ni maske ta pa su mesun bon, e ta hasi dolor y e ta un sentimento inreparabel cu nunca mi a pensa di lo por bay pasa aden. E duda ta keda den mi pero mas mi wak e den su cama drumi, mas alivia mi ta sinti mi paso tanto pami y pe lo tin un bida miho ta spera nos. Apesar di distancia, mi amor lo keda inmenso pa mi yiu.

Despues di algun tempo mi a purba na continua cu mi bida. E pensamento diario ta keda pero mi tin cu sigui biba. Mi a conoce un otro persona cu a yena mi bida cu alegria y e amor cu tanto mi tabata sinti falta di dje. E ta poco dificil pa cuminsa un relacion nobo cu un secreto pero mi a prefera pa mantene mi prome embaraso scondi pa asina di berdad niun hende haya sa, kisas mi tin cu open up cu mi pareha pero pa awor aki mi no por. Mi no kier trece tur e recuerdonan den mi presente.

Riba un dia sin spera mi a ricibi un email for di mi ex y hunto el a manda un foto di nos yiu. Un criatura asina dushi cu mi no por imagina mi bida sin dje, pero pa orguyo y e miedo di lanta y cria un mucha cu down sindrome, a pone cu mi a entrega tur derecho na su tata. E recuerdonan a bin ariba y mi no por a contene mi tristesa. Un mucha cu bo ta wak e alegria den su wowo pero alaves den brasa di otro cu e ta yama mama. E ta duro y ta un sentimento cu mi no lo desea ningun hende muher pasa aden.

Mi a dicidi di acerca e tata bek y puntre si mi por busca acercamento cu si e ta lagami ta cerca di nos yiu, mi yiu. El a contestami cu e derecho eynan mi a perde for di momento cu mi a firma e acuerdo. Mi a conteste cu mi no kier kita e mucha for di dje, simplemente sinti un brasa, un caricia paso mi ta keda su mama biologico. Mi no a tende nada mas, ta parse cu e no kier mi acerca nos yiu pues mi a dicidi di bay enfrente personal na Spaña.

Sinta den avion ainda e duda ta den mi, si mi ta haciendo bon di acerca nan, pero di otro banda mi tin e derecho como mama di wak mi yiu apesar cu mi a entrega e tata voogdij completo. Niun hende no lo bay interveni pa mi wak mi yiu. Kisas mi ta zona hopi hipocrita pero solamente un mama sa kico e sentimento ta y di kico mi ta papiando apesar di mi desicion y pasado. Una bes cu mi a pisa Spaña, un cos so mi tin den mente, di por sikiera wak y brasa mi yiu chikito.

E acercamento no a bay facil. Nos a enfrenta otro y discuti hopi fuerte pero tur e problema y palabranan ofensivo a pasa pa olvido una bes cu mi tabata tin mi yiu den mi brasanan, un sentimento sin palabra pa splica. Un criatura chikito, inocente y felis cu tin tur cos na su disposicion pa crece y lanta na ta un mucha felis y sin ningun problema di ta uno special. E ta duro pa wak un otro persona como su mama siendo cu mi ta bibo, pero di otro banda mi ta sintimi alivia cu e persona aki stima mi yiu y kier e como uno di su mes.

Mi lucha no a termina, awor mi tin e forsa y curashi pa enfrenta mundo. Mi no tin cu duna niun hende splicacion di locual cu mi a hasi, e desicion tuma ta entre ami y mi Dios. Awor cu mi ta un muher adulto, studia y cu un carera stabiel ta dispuesto pa cuminsa cu e proceso legal di recupera mi yiu bek. Mi no sa si mi lo bay logra recupera mi yiu bek pero mi lo bay todo por todo. Un desicion di pasado cu a afecta mi mental y emocionalmente ta poni den pasado y olvido, awor den presente tin solamente un deseo, di tin mi yiu bek den mi brasanan.

Un embaraso hoben cu a pone un mama tuma decision pa sacrifica ser ‘mama’ simplemente pa duna su yiu un mihor bienestar di bida. E ta dificil continua bida sin por sa con bo yiu lo ta y den kico tur e ta pasando.

LEAVE A REPLY

Please enter your comment!
Please enter your name here