“Love is made up of three unconditional properties in equal measure; Acceptance, Understanding and Appreciation”

Un storia profundo caminda cu un mama ta bibando cu un mentira. Un tata ta criando un yiu cu no ta di dje. Un decision di bida, a pone cu awe e mama ta bibando cu e secreto aki ya pa 10 aña caba sin pensa ariba e consecuencianan di mayan.

Hi Michelle,

Mi ta scirbiendo bo e carta aki conta bo mi storia di Bida Real. Mi ta kere cu hopi por siña di tur locual cu mi a hasi y tur locual cu mi a pasa y ta pasando aden. Mi kier pa mi storia por fungi como un ‘inspiracion’ of mas bien un ‘eye-opener’ pa tur hende muher. No tin nada mas bunita di por biba un bida sin mentira y secreto. Den mi caso pa situacion di bida, mi ta bibando cu un secreto cu nunca mi lo por desvela. Tin biaha un mama tin cu tuma desicionnan den bida na bienestar di su yiu. Un yiu ta significa tur cos den bida di un mama y den mi caso, mi lo hasi tur lo posibel pa mi yiu wordo stima y no menosprecia. E mucha no tin cu sufri pa mi desicionnan den bida.

Sali na estado cu mi 17 aña no tabata facil pero abortus no tabata un opcion. E unico cos cu tabata preocupa mi tabata e identidad di e tata biologico di mi yiu. Como hoben bo ta explora tur cos den bo ‘teenage’ years. Mi tabata tin varios guy e mesun momento cu mi tabata tene relacion sexual cu nan, pues sigur no un momento pa ta orguyoso di dje. Mi mayornan semper a lanta mi cu respet y cu norma- y balornan di bida. Ora cu mi mester a enfrenta nan cu e noticia di mi embaraso, tabata un momento di berguensa cu nan mester a procesa, cual mi no ta culpa nan tampoco. Como mayor, nan tabata kier sa kende ta e tata pero mi a bisa nan cu pa awor aki, mi no lo kier tin’e cerca sino mas bien concentra riba mi yiu. Mi no por a bisa nan cu mi no sa kende ta e tata, esey lo caba di duna nan un desapunto completo.

Mi a cuminsa hasi algun conteo di fecha y pensa bek atras pa wak kico tur mi por corda y cu kende. Algo cu si mi sinta y wak bek, ta algo hopi baho y sigur un falta di respet pa mi curpa, un curpa di hende muher. Mi a yega na e punto cu mi sa kende e tata lo por ta pero tin un detaye chikito cu mi a laga afor. E conteo ta hiba mi bek cerca mi guy e tempo ey, cual ta un persona cu mi por bisa cu nos tabata tin un bon relacion. E tabata tin 19 aña y ami 17 aña, nos tur dos den examen klas di nos estudio. E unico dia cu ta bin den mi mente tabata un merdia na su cas siñando pa un examen pero diripiente e mester a sali bai hasi algo pa su tata, cual a laga mi so den cas hunto cu su ruman homber di 22 aña. Mi no sa con ni pakico pero nos a termina ta drumi cu otro y e mesun anochi mi a drumi cu mi guy.

Mi no por splica kico a sosode pero e ta un dia cu mi no lo lubida nunca mas. Un dia cu mi a tene relacion cu ambos ruman, y awor mi no sa cua di e rumannan ta e tata biologico di mi yiu. Na momento cu cos no tabata mucho bon entre ami y mi guy, mi mester a bise cu mi ta na estado. Mi no a hasie pa mi wanta mi guy cerca mi of pa mi strob’e di busca un otro pareha, pero simplemente cu mi embaraso lo bay cuminsa mustra pues tur hende lo bay puntra nan mes kende lo ta e tata di mi yiu. Algo sin spera, un alegria inmenso cerca mi guy, algo cu nunca e lo a imagina cu lo bay pasa asina lihe, pero cu e ta cla pa loke sea bini su dilanti. Ami contento paso nos lo bay purba na hiba un bida y relacion mas serio, sin pleitamento y sigur ya caba uno como adulto mirando cu nos yiu lo ta na caminda. Unabes cu nos tur dos a realisa kico tur ta pasando, nos a bay sinta cerca mi mayornan, y a dicidi pa mi guy bin biba cerca nos na cas, ya asina nos tur por ta hunto.

E preocupacion cu mi tin, ta cu si un dia e secreto aki sali na cla. Con lo mi cuminsa na splica e dos ruman hombernan cu mi a tene relacion cu nan e mesun temporada y cu mi a sali na estado. Mi tin e miedo pa nan haya sa, pero un tata biologico tin biaha sa sinti un atraccion fuerte ora ta trata di su propio yiu. Mi yiu ta hopi pega riba su ‘omo’. Mi mes no sa kende ta e tata di mi yiu, aunke tin biaha e ruman sa duna comenarionan skerpi pero mi a siña di ignora nan. Sin pensa, un hende cu nunca mi a spera, a bati na mi porta.

Un di mi mihor amiganan a yega nos cas, aunke cu nos tabata tin varios aña sin mira y papia cu otro debi cu e tabata den exterior, nos a keda mihor amiga di otro mirando cuanto cos y secreto nos sa di otro. Con straño cu e por zona, e sa di mi secreto y a hura mi cu nunca e lo comenta of trece esaki dilanti. Pero den e situacion cu e ta, mi tin miedo. E ta saliendo cu e ruman homber di mi partner, cos cu nos niun na cas tabata sa debi cu e ruman no ta conta su cosnan na ningun hende. El a comenta berdad cu e ta papiando cu un mucha muher den exterior pero nunca el a menciona kende.

Nos a cuminsa combersa cu otro manera cu nunca nada a pasa, ta parse cu nunca nos a separa for di otro. El a conta mi hopi cos, tur su aventuranan na Hulanda. Nos a pasa hopi great ‘catching up’. Algo cu mi tabata tin mester, despues di dje, mi no tin ningun otro amiga pues mi ta contento cu e ta bek. No a dura mucho pa el a trece e topico riba mesa. Mi no tabata sa kico pa a bise, ta un secreto cu mi no kier papia di dje aunke cu e tin razon. Mi yiu mester sa e berdad un dia, e tin e derecho pa haya sa kende ta su tata biologico. Apesar cu mi partner ta dune tur e cariño y amor cu e merece, pues e no tin mester di nada mas. Mi semper a lanta ta scucha cu tata no ta esun cu a traha sino esun cu ta cria, esun cu ta duna amor y esun cu tey den bon y den malo. Mi a bisa mi amiga cu asina e lo bay ta tambe, mi no ta sinti cu niun hende mester sa, dolor so e lo bay causa tur hende.

E ta dificil pa biba cu un secreto asina profundo y cu lo causa tur hende dolor pero mi no kier causa mi yiu ningun daño creciendo, si na grandi e yega y bin puntra mi, mi lo sinta y conte tur cos apesar cu si e bira lomba y odia mi pa resto di su bida. Tur hende tin cu para pa nan actonan y ami ta para firme tras di e desicion cu mi a tuma. Den bida tin cosnan cu ta pasa cu despues bo ta arepenti, y esaki ta algo cu mi lo bay biba cu ne pa resto di mi bida. Mi tabata tin 17 aña ora cu mi a tene relacion cu ambos ruman y awor mi tin cu biba cu esey. Locual si mi tin cu bisa ta cu tur dos ta tratando mi yiu bon y ta dune tur cos, simplemente cu niun hende no sa kende ta e tata biologico. Mi ta kere cu mas mi yiu crece, mas e lo bay tira pa su tata biologico cua apariencia, pues pa esey tambe lo mi tin cu ta prepara pe, cu hendenan lo bay comenta rond cu kisas e ta parse su omo y no su tata.

Den mi curason, mi no sa kico pa pensa, mi tin un duda pero mi kier keda kere cu e partner cu mi a scohe pa pasa resto di mi bida cu ne, ta e tata biologico di mi yiu. Locual cu a pasa algun aña atras cu e ruman homber di mi partner tabata algo di locura, un momento debil y sigur algo cu a pasa sin pensa riba e consecuencianan. E unico cos bunita cu a sali afor di e aventura aki ta mi yiu homber, y mi ta biba y hala rosea pa wak e bira grandi y un homber fuerte y decente den comunidad. Mi ta kere cu mi amiga tin cu bay tuma un decision, of e ta kies pa ta di berdad mi mihor amiga y warda e secreto aki hunto cu mi, of e ta kies pa realisa su bida cu e ruman homber, cont’e tur cos y wak kende y cuanto hende lo sali lastima for di e situacion aki.

Sigur mi por bisa cu den e mundo moderno aki cu nos ta bibando den dje, tin tur manera pa realisa un DNA, pero mi no lo por biba cu un resultado cu mi no ta cla pa enfrenta. Mi tin den mi pensamento y curason cu mi a hasi e escohencia corecto di ta cu mi partner actual y cu e ta e tata biologico di mi yiu, pero mi no sa con pa reacciona y enfrenta bida y tur hende si e resultado ta otro di locual cu mi ta sinti y pensa. Un conseho cu mi por duna na tur hende ta na stima boso yiunan mas cu por, duna nan tur cos y sea semper honesto cu nan. Den mi caso mi a dicidi pa hasi otro pero mi ta kere cu si mi tabata tin un edad mas halto, madura y no 17 aña, lo mi a actua diferente. Mi ta spera cu ningun hende lo husga mi, pero sino mas bien wak mi punto di bista y cu mi ta un mama cu simplemente ta proteha su yiu di un dolor inmenso.

Un storia cu ta pone bo pensa con leu un persona por bay como mama. Algo cu si ta di admira ta cu e ta protegiendo su unico yiu, pero di otro banda un yiu cu ta bay lanta y crece sin sa kende ta su tata biologico. Mi ta kere cu no tin nada mas bon den e bida aki pa ta honesto cu tur hende, sea ta cu bo yiu of cu bo partner. Nos no mester lubida cu tur nos actonan tin consecuencianan pa futuro.

LEAVE A REPLY

Please enter your comment!
Please enter your name here