“Every time he raised his hands on her. He killed a prince from a fairy tale somewhere deep within her heart, brutally”

Nos inbox semper tabata yen di storianan profundo riba violencia domestico. Un topico sigur delicado pero cu mester wordo conta. Esaki ta un storia profundo di un dama sufriendo ya pa 12 aña caba maltrato den cas na man di su casa. Un dama cu a perde tur speransa, un dama cu ta biba cu miedo, un dama cu a acepta un bida asina pa bienestar di su dos yiunan.

Hi Michelle,

Permiti mi un espacio den bo seccion tan gusta y lesa. Mi mester a tuma un curashi pa mi por a sinta y skirbi bo un email. Mi situacion ta uno hopi delicado paso mi a tuma un desicion pensando riba e bienestar di mi yiunan. Mi ta kere como mama, bo lo ta capas di hasi tur cos contal cu nada ni niun hende hasi algo contra bo yiunan. E no ta facil pa biba den un cas abusivo cu constantemente tin pleitamento y abuso fisico. Violencia domestico ta algo cu mi no ta aproba pero circumstancianan di bida ta pone bo soporta.

Nos tabata tin un dushi matrimonio, uno felis y contento. Mi no tabata tin ningun problema y semper nos por a comunica bon cu otro. Nos tabata tin un bon comprendimento pa cu e muchanan, manera bo ta bisa, un matrimonio felis. Nos a conoce otro na scol y for di e prome momento cu nos a cera conoci cu otro, nos tabata inseparabel. Nos tabata biba y hasi tur cos pa nos yiunan cual ta e centro di nos amor y cariño.

E problemanan a inicia ora cu mi casa a perde trabou y a keda cas pa basta tempo. El a drenta den un depresion cu mi no por a yude sali for di dje. E unico cu mi por a hasi tabata di support y dune tur atencion pa e no bira hasi algo contra su mes persona pa e no lamenta mayan. Discusionnan a bira dia pa dia mas fuerte pa motibo di plaka y algun recibo a cay atras. E no tabata por a soporta cu mi tabata e unico cu un salario den cas, aunke semper e tabata un problema caba cu mi tabata gana mas placa cu ne pero nunca un problema serio, pero awor cu mi ta e unico, cos ta diferente.

Mi ta corda cu e prome biaha cu el a lanta man pami tabata durante un discusion cu a surgi paso banco a yama y a avisa cu tin un retraso di cuenta. Nos a pleita y unda cu mi a bise cu ami no por yuda cu banco a yama cu kisas si e tabata mas atento cu cuentanan financiero, banco no a yama y avisa di e retraso. E discusionnan a bay asina leu cu el a dalmi un wanta y bisami pa mi no papia asina mas cu ne y cu e no merece e actitud ey dimi. Mi a bise cu mi tampoco merece e wanta cu el a dalmi siendo cu mi ta e unico persona cu a sostene tur tempo.

Despues cu mi casa a dalmi pa prome biaha, mi a hura mi mes cu hamas y nunca mi lo permiti un homber pone man riba mi. Mi a dicidi pa keda keto, kisas tabata mi gran error, pero mi a keda keto pa no trece mas problema y hasi e situacion mas grandi. Danki Dios cu mi yiunan no a presencia nada y tampoco a ripara nada na mi cara, apesar cu no a keda ningun marca, esey tambe tabata un di e motibonan cu mi a keda keto paso den mi pensamento e wanta tabata minimo.

No a dura mucho cu mi casa a bolbe lanta man dalmi, e biaha aki si su man a baha pisa te cu el a marca mi cara. E miedo pa e lanta man atrobe of bira un custumber a cuminsa lanta den mi. Mi no sa kico pa hasi, si mi tin cu entrega un denuncia of dijs keda keto cu e speransa cu esaki no lo bolbe pasa pa di tercer biaha. Mi casa mes no ta consciente mas di e daño cu e ta causando mi, e temor, e inseguridad cu poco poco ta creciendo den mi cu ta poniendo mi duda den mi rol como esposa y mama, kico mi ta hasiendo robes pa ricibi un trato asina mi no sa. E ta dificil pa sinta y combersa cu un hende debi cu e ta un secreto familiar. Niun hende mester sa kico ta sosode den mi cas pero di otro banda ami ta esun cu ta sufriendo.

Mi ta purba na combersa cu mi casa pa wak si e ta realisa kico e ta hasiendo cumi, pero nos no por rasona mas como un pareha casa. Nos no por papia mas cu otro, nos ta pleita hopi, casi tur dia tin pleitamento den cas, algo cu a cuminsa afecta e muchanan. Mi a ripara cu e muchanan a cuminsa cana cu miedo den cas. E ta tristo pa wak nan asina, nunca nos a lanta man pa nan, nan nunca por bisa cu mami of papi a zundranan, pa awor nan mester scucha cu papi y mami ta zundra otro den cas manera enemigo di otro.

E situacion a cuminsa na afecta e muchanan na scol cual tampoco tabata e intencion. E zundramento den cas tabata birando mas intenso, nos a cuminsa na falta otro basta respet y cosnan a cuminsa sali for di man. Tabata un anochi cu nos tur sinta na mesa comiendo hunto como famia, unda cu mi yiu a hasi un comentario cu dicon papi ta grita mami asina hopi, mi casa su beis a daña y cuminsa zundra na mesa gritando cu nos ta mal agradecido. Mi a purba na bay defende mi yiu cu el a hisa e tayo di cuminda dal mi cu ne.

E impacto di e tayo tabata asina fuerte cu el a kibra den mi frenta lagando mi cu un kap. E muchanan a spanta y cuminsa grita, mi no por a reacciona mucho debi cu mi cara tabata completamente na sanger y no por a wak mucho bon. E unico cos cu mi por a hasi ta bisa e muchanan cu mami ta ok, pero cu nan mester bay den nan camber. Mi a coy un paña di cushina pone na mi frenta y primi esaki duro na moda cu e sangramento por stop. Mientrastanto mi casa a bay den camber y hasi como si fuera nada no a pasa. Asina cu e sangramento a stop poco, mi a subi auto y bay eerste hulp pa wak kico tur mester wordo hasi.

Despues di varios dia, mi casa a bin pidi mi despensa y cu e no sa dicon el a reacciona asina. E mes kier busca yudansa paso e sa cu su caracter ta afectando e muchanan na cas, pero na mesun turno el a bisa mi cu si ami no provoke, e no ta reacciona asina. Na es momento eynan mi a realisa cu ni kico mi hasi of yuda cu un tratamento medico pa su caracter, e ta keda busca algo pa culpa otro hende y no su mesun persona. E unico cos cu mi a conteste ta pa nunca di su bida e pone un man ariba e muchanan, e por hasi kico cu e kier cu mi pero cu mi yiunan hamas y nunca e ta mishi. El a contesta mi cu nan ta su yiunan tambe y cu mi no tin e derecho di menase. Eynan mi a ripiti, cu e por hasi kico cu e kier cu mi pero cu mi yiunan e no ta mishi.

Na un otro ocasion, e muchanan tabata hungando pafor. Bo por a tende nan claramente ta diberti nan mes debi na nan grito y harimento. Un alegria inmenso bao di nan apesar cu e situacion na cas keto bay ta tenso. Den tur nan alegria mi a casa a hala nan atencion paso nan tabata gritando mucho duro y cu e bisiña por reclama. Mi a bisa e muchanan pa hunga poco poco paso berdad e bisiña por rabia. Mi casa a rabia mesora debi cu mi a pasa riba su autoridad, el a cuminsa grita cu aki den cas e ta manda, cu ningun hende mester bisa locual cu tin cu wordo hasi. Mi no tabata compronde kico tabata pasando pa simplemente mi a bisa e muchanan pa nan hunga mas rustig, ta locual cu mi casa tambe a bisa nan pero kisas cerca mi, mi tono tabata un tiki mas abou. El a manda e muchanan den camber na straf paso nan no ta hungando na e manera cu e kier of a bisa nan. Eynan mi a para riba paso mi a bise cu laga e muchanan hunga, nada no ta pasando y pa e calma un poco paso e ta alterando por nada. Den un solo manda mi a sinti un mokete na mi cachete, un pusha fuerte contra muraya pa despues mi sinti varios skop den mi heup. Mi bista a bira scur y mi no tabata sa nada mas, te despues cu mi a lanta bek riba cama na eerste hulp.

Na momento cu mi a lanta, mi a cuminsa grita pa mi yiunan. Mi no sa con ni kende a trece mi eerste hulp pero mi yiunan tabata den camber di espera cu mi ruman muhe. Despues cu mi casa a bati mi, mi yiunan a core yama mi ruman muhe pa e core bin cas debi cu papi a dal mami. Un situacion hopi fastioso pero alabes teribel pa e muchanan experiencia. Mi ta contento cu mi yiunan ta bon, hopi trauma pero trankilo cu mi casa no a pone man riba nan. Asina mes cu mi casa a yega e limite pa pone man riba un persona, den e caso aki su propio casa y hende muhe, mi no a duna denuncia of entrega keho pa no daña su rapport di buena conducta. Violencia domestico ta algo cu mi ta condena completamente, mi no ta aproba ningun tipo di violencia den ningun circumstancia pero como mama y pa proteccion di bo propio yiunan, mi lo ta capas di wanta un mokete te hasta mucho mas.

Un storia cu un topico delicado. Violencia domestico ta algo cu personalmente mi no ta aproba ni apoya. Un caso cu ta ponebo pensa con leu un mama lo keda soporta y acepta pa bienestar di su yiunan. Mi ta kere cu no tin nada mas mihor pa denuncia tipo di actonan asina, apesar cu bo tin miedo y kier proteha bo mes y bo yiunan pero pa keda biba den un abuso, tampoco no ta saludabel pa bo mes y bo yiunan. MH

LEAVE A REPLY

Please enter your comment!
Please enter your name here