“You’ve got to dance like there’s nobody watching, Love like you’ll never be hurt, Sing like there’s nobody listening, And live like it’s heaven on earth”

Un bunita storia caminda cu un lector kier comparti cu nos su experiencia di bida, un momento final cu el a pasa cu un ser keri. Bida ta un misterio y e momento di mas bunita ta e ultimo rosea di un ser humano, aunke con straño cu e por zona y kisas un pensamento cu hopi no lo comparti, e ta keda un momento ‘intimo’ entre abo y e ser stima cu bo ta yamando ‘ayo’ pa ultimo biaha.

Hi Michelle,

Mi kier a comparti mi experiencia di bida cu bo fiel lectornan. Esaki no ta un storia cu algo malo a pasa mi pero algo di mas bunita cu mi a pasa aden. Nos bida riba e mundo aki ta algo misterioso pero alabes bunita. Mi por bisa cu kisas e ta e momento di mas bunita cu un persona por cera cu un persona, e ultimo ‘ayo’ por significa hopi y lo keda graba den bo pa semper. E combersacion cu bo ta hiba cu e ser stima ta uno intimo, uno cu bo ta keda pensa semper y lo ta keda den bo memoria, e tabata ‘e’ momento cu hopi cos ta keda revela, pero mas aun e storianan di bida cu bo ta scucha di e persona cu nunca bo tabata sa di dje.

Den mi caso tabata cu mi propio mama. Un ser muher balente cu un caracter fuerte. Semper a lucha pa hiba su yuinan dilanti y a percura pa nos no a falta nada. E malesa di cancer a bati na mi mama su porta y pa un momento el a entrega su mes pa e malesa domina su curpa, pero cu hopi FE y perseverancia nos a lucha y purba na domina e cancer. Sin pensa dos biaha nos a subi avion direccion Hulanda. Na Hulanda nan a bisa nos manera cu e situacion ta, cu no tin salbacion mas pa mi mama y esey ta locual cu a duna nos e comfort. Kisas mi ta zonando hopi fuerte y kisas sin sentimento pero ta locual cu mi mama a siña nos for di chikito pa no ‘yora’ e momento perdi, pero biba y goza di e resto di momento cu ta keda nos y esey ta locual cu nos a hasi. Nos no a sinta yora paso cu nos mama lo bay laga nos sino mas bien nos a celebra bida cu ne. Nos no tabata sa cuanto tempo lo a keda pero for di e momento cu nos a haya sa e noticia, nos a dicidi pa stop tur cos y cuminsa brinda mi mama e tempo cu nos, hasie sinti hopi stima, keri y agradeci pa tur locual el a significa pa nos y tur esnan rondo di nos.

E no ta facil pa bo ignora un malesa cu bo sa cu e tey pero di otro banda e felicidad riba e cara di bo mama rondona pa su yiunan ta ‘priceless’. Tin dia cu e ta lanta malo pero otro dia e ta lanta alegre y yen di bida pues nos tabata biba dia pa dia y hasi tur locual cu ne cu e tabata kier a haci. Nos tabata bay su consultanan regularmente y cada bishita tabata diferente, otro noticia, otro caida pero asina mes nos ta continua. Mi mama su salud a bay atras, e tabata cansa hopi mas pero hasta asina e ta keda cu un sonrisa riba su cara y ta trata na ta contento pa no preocupa nos. Nos a dicidi pa hasi un trip chikito den Europa pa asina nos pasa nos ‘ultimo’ vakantie hunto como famia.

E vakantie cu nos a tuma tabata uno cu hamas y nunca mi lo lubida. Tur dos di mi ruman- y nan yiunan tabata hunto cu mi y mi mama. Nos a hari, yora, brasa otro pero mas aun nos a uni mas cu otro. Mi mama constantemente tabata ‘remind’ nos bida ta bunita pero nos mester biba bon cu nos rumannan, yuda otro y principalmente pa nos stima otro incondicionalmente, esaki ta un les di bida cu mi mama semper a purba na educa nos cu ne. Den tur nos celebracion di bida, mi mama a dal tres stap atras cu su salud y a bay den su fase terminal. Algo duro pa bo wak ta bo mesun mama, un muher cu yen enegria y bida, awor drumi riba cama sin por hasi mucho y yen di dolor.

Dokternan a duna nos su diagnostico final cu a resta mi mama algun siman di bida ainda, nos no sa si tabata uno, dos of mas pero nos a ‘switch’ nos mente pa e pio y cuminsa biba prepara. Mi mama dado momento a acepta cu el a perde su bataya contra cancer pero ta contento di por a biba tanto aña y cu Dios a bendishon’e cu 3 yiu y 5 nieto. Agradeci na bida y na nos como yiunan cu a dune tur e felicidad di mundo siendo un mama soltera. Den su ultimo dianan mi mama a pidi un merdia cu cada un di su yiunan pa e por combersa cu nos y duna nos asina un ultimo les di bida.

Mi ultimo momento cu mi mama tabata e momento di mas bunita di mi bida. E momento cu ni con grandi mi ta di edad, mi mama a yama mi na e nomber di cariño cu e tabata tin pami, e ultimo momento cu el a pasa man den mi cabey, caricia mi cara, tur ta momentonan di mas bunita. No tabata importami si den 5 of 10 minuut e lo hala su ultimo rosea, pami locual tabata conta ta e bunita momento cu mi tabata comparti cu mi mama. El a pidi mi pordon pa tur locual e por a faya mi den dje pero no tabata tin un momento cu mi ta ‘regret’ di a pasa cu mi mama. Mi storia no ta pa haci sensacion cu mi sentimentonan pero pa mi conseha bo lectornan pa no sinta yora, cuestiona bida pero sinta hari, brasa y sunchi e persona special cu ta bayendo. Pensa cu e ta bay den un miho mundo, leu di nos pero cerca di curason.

Un storia cu por touch nos den tur sentido di palabra, sigur un storia scirbi cu hopi amor pero alabes cu un trankilidad. Cada frase tabata scirbi cu un paz y aceptacion, un lector cu sigur a biba e ultimo momento cu su mama, un momento di felicidad den su palabra y sigur nos ta respeta e lector pa su forza y amor incondicional na su mama.

LEAVE A REPLY

Please enter your comment!
Please enter your name here