Nathalie Maduro su estilo di bida ta caracterisa como un Cunukera of Boerin. El a logra hopi di su obhetivonan den su trabou como Directora na Santa Rosa, door di no laga e echo, cu e ta hende muhe, strob’e of intimid’e den un mundo cu ta percebi como un mundo di hende homber.
Den su punto di bista e ta haya cu tin un crecemento den agricultura, cria y pesca cu ta e sectornan primario na Aruba. E reto di mas grandi cu Nathalie Maduro a encontra den su funcion na Santa Rosa, tabata pa convence tur persona na Aruba, incluyendo e mandatarionan, cu e sector primario di Aruba tin e mesun balor economico cu turismo, pero cu en bes di enfoca riba e entrada financiero, mester midi e cantidad di produccion, cual tin un balor inmenso pa nos seguridad di cuminda y entrada, cu ta keda draai den nos economia local.
Den su opinion, turismo ta locual ta mantene nos economia sano y stabiel, mientras cu nos sector primario ta locual ta alimenta y fortifica nos habitantenan como tambe nos bishitantenan, mediante e produccionnan constante y saludabel. Su experiencia como hende muher den e sector aki ta, cu e ser femenino ta nace cu un talento cu yama “multi-tasking” y esaki sigur ta un ‘added value’. Pero di otro banda e ta aprecia tur su coleganan masculino, cu semper a sa di respet’e, sosten’e y traha banda di dje, pa hunto nan logra e metanan poni, sin laga e echo cu e ta hende muhe, interferi.
Como mama, e ta sumamente orguyoso di mira con Alina kier sigui su pasonan. Desde baby Alina a crece riba nan boerderij y awendia su pasion pa e estilo di bida aki ta grandi. Aparte di yuda den cunucu, e tin hopi amor pa bestia y specialmente pa e deporte di cabay. Otro pasion cu ambos tin, ta e amor pa yuda comunidad y mediante Kiwanis Club of Aruba y Kiwanis Builders Club, esaki ta posibel pa nan por yuda cu hopi proyecto hunto. Ta pa e motibo aki cu Nathalie ta yama Alina: “Mini Me” … Den edicion di FOCUS pa luna di maart por lesa e entrevista completo cu Nathalie Maduro.
