Den un entrevista cu revista FOCUS aña pasa na october, Adrienne Fraser a relata riba su triunfo como Miss Bikini Fitness 2017, unda a tum’e 1-2 dia pa e por a realisa cu el a logra bay cu tur e premionan. E sacrificio, dedicacion, perseverancia, ‘breakdowns’ na caminda, ‘juggle’ pa combina su trabou cu su trainings, diet, negoshi, bida social y personal tabata bale la pena. E logro aki sin duda tabata un estimulo pa Adrienne sigui pa otro competencianan riba nivel internacional.

Desde fin di november aña pasa el a cuminsa prepara 100% pa Medellin, Colombia pa su participacion na Mr. Olympia South America. Su Pasco y Aña Nobo tabata completamente diferente p’e, sacrificando hopi otro cos tambe. Hunto cu su coach, Rene Wild, nan a dicidi pa hasi e preparacion un poco mas largo p’asina e ta menos pisa riba su curpa. Cu nan ta yega e destinacion final mas sigur, miho prepara, y cu e mehoracion y ahustenan necesario. Adrienne den su prome competencia afo a sali na di 6 lugar den Olympia Amateur South America 2018. Aunke e tabatin Ohio den su mente, e no tabata algo sigur te apenas 2 dia despues, cu el a baha di e escenario na Medellin momento cu el a dicidi di purba toch na Ohio.

E tabata e miho decision cu e por a tuma despues cu su coach Rene Wild y tambe e conocido Pro Bodybuilder Roelly Winklaar, a convenc’e pa haci’e. El a dicidi cu e ta bay p’e como cu e ta 1 siman so despues di e competencia na Medellin. Principalmente mirando cu loke e huesnan ta busca na por ehempel Sur America, ta diferencia cu esnan na Merca. 
“Y esey a resulta di ta berdad. Nos a haci algun ‘minor tweaks’ e siman despues di Medellin y asina mi a bula bay Ohio pa subi e di dos escenario mas grandi den e mundo di Bodybuilding”.

 

Adrienne su experencia na Columbus, Ohio durante su participacion na e “30th Arnold Classic” tabata simplemente unico. El a logra ‘4th Place” den “Arnold Amateur Bikini International Finals”. For di e organisacion, e evento completo, e trato di tur e participantenan, e organisacion y su team hunto cu su logro cu a marca historia pa Aruba. No tin pa compara! Awor Adrienne ta compronde dicon e evento aki ta conoci mundialmente pa ta un evento di 5 strea. Riba esaki, Arnold Classic ta e dos escenario/evento mas grandi den e mundo di Bodybuilding. E evento aki a surpasa tur su expectativa y ta apenas su di 2 competencia internacional, sin embargo e por bisa cu e esun cu mas el a encanta.

Na e momentonan aki Adrienne ta tumando un ‘off-season’ pa asina e por crece musculo y mehora caminda mester mehora. Esaki despues di a ricibi super bon comentario y feedback di algun di e huesnan. Hunto cu su coach el a sinta planea su proximo pasonan y manera cu tur cos ta mustra, e atleta lo subi escenario den e di dos mitar di aña. E no kier divulga nada ainda te na momento cu tur cos ta mas concreto.

 

 

 

LEAVE A REPLY

Please enter your comment!
Please enter your name here