E aña a cuminsa cu headlines di e matrimonionan real Europeo. Na Lima a tuma luga e luhoso boda di e peruano di alta sociedad Alessandra de Osma y prins Christian di Hannover, cu a contrae matrimonio pa misa dia 16 di maart 2018. Otro aconticimento cu ta sigui captura atencion internacional ta e boda di prins Harry cu Meghan Markle, cu ta tuma luga dia 19 di mei na St. George’s Chapel na Windsor Castle. E segundo boda real na Inglatera ta na mesun St. George Chapel aki unda e prima di prins Harry, esta princess Eugenie ta casa cu Jack Brooksbank dia 12 di October. Y awor por tin un boda real mas na caminda: Charlotte Casiraghi y Dimitri Rassam.
Charlotte Casiraghi, e yiu muhe grandi di princess Caroline di Monaco y nieta di e actriz Grace Kelly, a haci su entrada riba red carpet na e evento anual na ‘Monaco le Bal de la Rose’ cu su novio, Dimitri Rassam. Charlotte tabata luci elegante den su trahe di gala preto cu pluma di e cas Yves Saint Laurent. Pero tur mirada tabata riba e impresionante renchi di diamante na su man links.
E pareha a compromete durante nan vacacion di ski algun siman pasa, segun people. Rumor ta core cu e pareha ta planea pa casa na Sicilia na juli proximo den un ‘vineyard’ cu ta propiedad di e mama di Dimitri y amiga di prinses Caroline, e actriz Carole Bouquet.
E pareha a ser introduci pa amigonan comun y a cuminsa sali cu otro for di 2016. Tur dos tin un yiu di un relacion anterior. Charlotte tin un yiu di 4 aña di edad, Raphael, cu su ex- Gad Elmaleh cu ta un actor y ‘stand-up comedian’. Na su turno Dimitri Rassam tabata casa cu e modelo, Maria Novoselova, y nan tin un yiu muhe hunto cu yama Daria cu tin 6 aña.
Aparte di e compromiso di Charlotte Casiraghi, su primo Louis Robert Paul Ducruet, yiu di prinses Stephanie di Monaco, a anuncia su compromiso cu su novia Marie Chevallier. Prinsess Caroline su nueranan; e billonaria Tatiana Santo Domingo y aristocratico Beatrice Borromeo ta sperando yiu. Famia real di Monaco ta den ful celebracion e aña aki!
