A heart is not judged by how much you love, But by how much you are loved by others.”

Un storia cu nos a ricibi for di un dama hoben cu simplemente a habri su curason cu nos pa asina nos por comparti su storia di Bida Real cu nos fiel lectornan. Mama soltera di un yui muhe, bon trabao pero ta biba cu un bashi grandi den su curason. Un storia di amor cu no tin un final feliz. Un bida cu e hoben aki a hiba pa 4 aña den un relacion amoroso cu e casa di un amiga.

Hi Michelle,

Mi kier a comparti mi storia di bida real cubo y bo lectornan. Mi ta mama di un yui muhe chikito cu mi ta stima masha hopi mes, e ta e motibo pa mi sigui lucha den e bida aki. Mi tin 2 aña ta bibando cu un tristesa den mi curason pero no un tristesa cu algo malo a pasami sino mas bien un duele di no por ta cu un persona cu mi a namora di dje. Pa un motibo of otro destino no ta uni nos, e motibo ta cu e persona aki ta e casa di un amiga.

Tur cos a cuminsa ariba un diabierna na un lounge cu tin riba e caminda di high rise hotels. Mi a caba di traha y a sali cu algun amiga dimi pa nos celebra un cumpleaños. Nos a yega e luga y un guy a habri e porta pa nos drenta pero e guy a keda wak mi hopi curioso. Un guy halto, cabey y wowo scur y tabata bon bisti. Tabata e casa di un amiga, pero den salimento mi no a reconoce mesora.

Henter e anochi nos a keda wak otro pero no a durf di aserca pa papia cu otro te ora mi tabata sinta na bar combersando cu algun amistad. El a yega cerca bin para banda dimi pa pidi un cos di bebe y el a bira puntra mi kico mi ta bebiendo, el a cumpra un drinks pami y asina nos a cuminsa combersa cu otro te den oranan laat di anochi.

Despues di e anochi aki mi no a wak e persona aki mas. Mi ta corda su nomber y unda e ta traha. Mi no a pidi su number di telefoon debi cu mi no ta un persona asina cu ta intercambia number y mucho menos cu e casa di un amiga. Mi tabata pasa tur atardi despues di traha dilanti su trabao pa wak si mi tabata wak e pero nada.

Despues di casi 3 luna sin wak of tende algo di e persona aki mi a ricibi un bouquet di flor na trabao. Un bunita sorpresa paso mi tabata pensa hopi riba dje apesar mi sa kende e ta. E flor a yega trabao sin niun texto of caarchi pero mi tabata sa cu e ta bini for di dje. Siguiente dia mi a bolbe ricibi un bouquet di flor y asina a keda full e siman te cu diabierna mi a ricibi uno cu caarchi cu tabata bisa “mesun lounge, mesun hora”.

E resto di dia ey mi no por a traha bon mas, debi cu mi mente tabata cada 5 minuut riba dje. Mi tabata pensa tur kico mi lo puntra of bisa. Mi a bel mi amiga pa puntre kico mi por bisti pa asina e haya mi bunita y atractivo sin sa cu ta su mesun casa. Mi a yega cas drenta baño, bisti mi paña y sali rumbo pa e lounge pa mi encontra cu e persona aki.

E ambiente tabata bon, musica tabata draai dushi pero niun señal di e persona. Mi a cuminsa cana paden pafo pa wak si mi ta wake, pero nada te cu happy hour tabata den caba y ainda nada cu el a aparece. Mi a dicidi di bay mi cas paso mi a rabia pero mas bien decepciona pa pensa cu un hende por a uza mi di e manera eynan. Si mi sinta pensa bon e tabata algo logico paso mi sa cu e ta casa anto mi a bay tras di un invitacion asina.

Rumbo pa cas mi a bin topa e persona aki na un stacion di gasolin ta combersa cu algun amigo. Mi a parkeer mi auto y a “gaña” bay cumpra cos den e tienda djis pa e wak mi of e ripara cu mi a wak e. Canando den e tienda el a drenta bin cerca mi y puntra mi si mi ta rabia cune pa su “no show” na e happy hour. Mi a contesta cu mi no ta rabia pero decepciona debi cu mi no ta gusta hende hunga cumi asina. El a puntra mi pa mi despense anto cu e kier pa nos a bay come un rato na un lugar trankilo unda nos por papia. Nos a end up na un restaurant chines. Un lugar tiki straño pa un “prome date” pero nos a combersa masha hopi mes y mi a haya sa mas cos di dje.

Nos amistad a crece y nos a bira mas ‘close’ cu otro. Nos tabata bay lunch cu otro varios biaha pero semper na camindanan ‘low-profile’ debi cu e ta un homber casa pero esey no ta kita cu nos tin un atraccion pa otro. Nos ta sinti bon ora cu nos ta hunto y ta purba pa no papia di nos relacion na cas pero purba na comparti momentonan nobo y crea algo bunita sperando cu nunca e lo termina, deseando semper pa e por desaroya den algo bunita pero esaki no tabata por. Mi mester confirma mi mes pa ta semper number dos den su bida. Loco pa grita na mundo henter cu mi ta namora na un homber prohibi pero esaki lo simplemente complica tur cos.

Nos relacion tabata birando mas fuerte cu otro. Nos momentonan intimo tabata algo incontrolabel y sigur un momento di pasion cu hamas mi a imagina mi mes. E tabata bin mi cas cu frecuencia pa nos ta hunto. E atraccion cu nos tin pa otro ta inmenso pero asina mes ora nos topa den grupo di amistad nos tur dos ta disimula pa ningun hende ripara of sospecha cu nos tin algo. E ta dificil pa por mira e homber cu bo ta stima den brasa di otro, cariciando otro of sunchi otro pero mi no ta den un posicion pa exigi nada. Mutuo nos a dicidi pa hiba un relacion asina sin di por reclama e otro. Ta di acepta y purba na domina mi emocionnan e momento eynan.

A yega un punto den nos relacion cu bo ta keda para keto un rato pa dicidi con boso lo kier sigui debi cu dia pa dia e ta birando mas dificil pa por ta hunto. E tin su obligacionnan na cas pero asina mes ta bin cerca mi. Locual cu nunca mi a pensa a pasa cu e ta scohe su famia y ta termina nos relacion. Sin ningun rason a dicidi cu nos relacion ta termina y cu e kier trata na hasi bon cu su casa. Cu lagrima na mi wowo mi a sinta scucha y habri man lague bay, no tabata tin un motibo pa lucha pa un amor cu nunca lo a bira dimi, solamente mas daño e por causa nos tur dos. E ta hasi hopi dolor pa wak e homber cu bo a bin ta stima ta dicidi pa termina tur cos y sigui su bida normal manera cu nada no a pasa.

Awe ta 4 aña despues cu nos a separa di otro, nos ta wak otro si pero di distancia ora nos sali. Locual cu mi lo keda cu ne ta su recuerdo y su refleho cu aunke e mes no sa nada pero mi lo kier mantene asina. Un yiu, cu su mama lo ta tur cos pe apesar cu e gana pa mi mustr’e su tata ta grandi, pero di otro banda mi tin cu compronde cu e tabata infiel na su casa y consecuencia di esaki ta cu un yiu a nace cual lo por complica tur cos. Mi yiu no falta nada, es mas mi pareha actual ta su tata y pa mi bay cambia esey awor, lo ta unicamente inconsiderabel di mi parti.

E no tabata facil na comienso pa mi enfrenta mundo cu un embaraso como un mama soltera y ainda no sa si mi tin cu biba cu e berdad den un secreto pa eternidad. Mundo tin ora ta pone prueba bo dilanti pa bo bira mas duro y pa mustra bo cu bida no ta facil. Tur hende tabata puntra mi kende e tata ta, pero mi tabata keda keto y cambia e tema apesar cu den mi, mi curason tabata cla pa grita e nomber y laga mundo conoce e persona cu a biba un pasion den mi. Ora mi wak’e of topa cu ne hunto cu su famia, e ta un sentimento mixto, pa un momento bo ta flash back tur cos pero despues bo ta realisa cu e sentimento y momentonan ey no lo bini mas, aunke mi lo laga tur cos atras pa nos ta hunto un biaha mas pero e biaha aki como e famia cu semper mi a desea.

E por mustra cu mi no ta stima mi pareha actual pero di berdad mi ta stim’e. El a yega den mi bida poco despues cu mi a duna luz y te e dia di awe e ta bandi mi ta comparti cu mi cada momento. Nos ta felis y hunto nos ta educando mi yiu manera cu mester ta. E ta simplemente cu tur hende tin e persona special cu nunca bo lo stop di stima apesar di tur cos. Kisas mi storia no ta esun di mas honesto pero tabata un temporada den mi bida cu nunca mi lo lubida y pa semper lo keda graba den mi curason y mente.

Un storia bunita pero cu un final tristo, kisas no locual cu nos ta custumbra di lesa den e seccion aki, pero tin biaha e ta bon pa trece storianan asina. Na e dama hoben aki mi kier a desea tur exito cu por tin den bida, cu pa e no wak bek den pasado y uza su experiencia como un estimulo pa sigui lucha bay dilanti.

LEAVE A REPLY

Please enter your comment!
Please enter your name here