Un di e paisnan den Latino-America cu mas historia. Peru ta comparti su fronteranan cu Ecuador, Colombia, Brazil, Bolivia y Chile. Peru tabata cas di varios emperador, pero esun mas conoci y grandi den historia tabata e emperador di Inca. Peru tabata pertenece na Reino Spaño prome cu nan a obtene independencia na aña 1821. Peru ta parti den 25 region mas un provincia cu ta Lima. Lima ta conoci como e capital di Peru. Un region di Peru cu tambe ta hopi conoci ta Cuzco, debi cu aki bo por bishita y aprecia un di e 7 maraviyanan di mundo cu ta Machu Piccho. Un pais sigur rico na cultura, historia, hospitalidad y grastronomia.

 

Cuzco – Machu Piccho

Cuzco ta conoci como e capital di e emperador di Inca. E motibo tras di esaki ta cu un di e 7 maraviyanan di mundo ta encontra su mes na Cuzco. Tur esnan cu bishita Cuzco no por keda sin bishita y admira Machu Piccho. Machu Piccho ta un ‘pueblo’ cu ta ubica den un montaña maso menos 2400 meter riba nivel di lama. Varios arqueologico ta pensa cu e pueblo di Machu Piccho a wordo traha pa e emperador Pachacuti. Machu Piccho ta mundialmente conoci como ‘Pueblo perdi di Inca’. Machu Piccho a wordo crea den un estilo di Inca. Cu piedranan a forma un temple, pa varioso conoci como e ‘tempelnan di solo’. Desde 1983 Machu Picchu ta wordo protehi pa UNESCO y na 2007 ela uni su mes na e lista di maraviyanan di mundo.

 

Lima

Lima ta e capital di Peru, conoci como e ciudad di mas grandi na Peru como tambe un di e ciudadnan di mas grandi den Latino America hunto cu Sao Paolo y Mexico City. Lima, originalmente yama ‘Ciudad di Reinan’, a wordo conquista pa e conquistador Spaño Francisco Pizarro. Awe Lima ta cas di un di e univeridadnan di mas biew na mundo, Universidad National San Marco cu a wordo funda na 1551 y ta actual tambe e universidad di mas biew den Latino America cu ta operando ainda. Pa 2019, Lima lo ta anfitrion di e weganan Pan Americano.

 

Gastronomia – Ceviche

Un di e platonan mundialmente conoci ta e Ceviche Peruano. Un plato di pisca tempera den juice puro di lamoenchi cu su origen a nace na Peru. Asina poco poco mas paisnan Latino a adopta e plato aki y modifica esaki na nan pais y segun nan propio ingredientenan. Ceviche semper ta wordo acompaña pa batata dushi, yucca, maishi y awacati, tur den un mescla di pisca curu den un juice di lamoenchi.

 

“Danki na Maduro Travel pa nos trip y tour cu a wordo super bon regla y hinca den otro. Nos a gosa di Lima y Cuzco ‘to the fullest’. For di zonanan colonial, te na museum cu antiguedad di inca Chinchero, pa pueblonan bunita mei mei di arquelogia di Inca, termina na Urpi cual ta e centro di textil cu muestra di diferente methodo pa tiña e lana di Alpaca. Un parti interesante cu bista di paisahe bunita tabata e ‘Sacred Valley’ y ‘Ollantaytambo’. Algo impresionante pa experencia tabata e viaje den trein pa yega Aguas Calientes y Machu Piccho, un bista cu bo por imagina solamente den pelicula manera sero y rionan cual ta crea expectativanan halto. E mainta di nos tour pa Machu Piccho tabata uno excitante, e serenidad di e lugar ta calmabo y dunabo un paz enorme, e bista panaramico ta increibel. Sigur un di e 7 maraviyanan di mundo cu mi por kita for di mi lista. Sin lubida riba e gastronomia Peruano unda cu nos a come super dushi mes!”

LEAVE A REPLY

Please enter your comment!
Please enter your name here