Maestro-, cabesante- y guianan interno ya ta cla pa ricibi nos mucha- y hobennan pa Aña Escolar 2018-2019. Hopi biaha ta lubida riba e gran trabou cu esunnan na encargo di enseñansa ta haci, y aña pa aña e retonan ta bira mas intensivo y grandi, pero asina mes, e animo ta halto cerca nan. Den revista FOCUS di e luna aki, por lesa di e retonan grandi den enseñansa for di e punto di bista di entre otro; Cindy Wernet, Dionne Lopez-Tromp, Eduard Pieters, Lissi Werleman-Paris, Maya Croes, Nicole Leslie, Noelia Estrada, Ryma v/d Linden, Sheila Tromp, Vivienne Koolman y Wendell Larmonie.
Den e area di enseñansa, den cualkier posicion cu bo tin, ta exigi pa e personanan tin competencia multiple, pa crea e conocimento preciso, cu ta permiti nan confronta nan trabou cu exito. E rol di e formadornan awendia, no ta encera solamente ‘siña’ algun conocemento, pero mas bien, pa yuda su alumnonan ‘siña pa siña’ di manera autónomo den e cultura di cambio aki y promove su desaroyo cognitivo y personal, mediante e actividadnan critico y aplicativo, pa crea e hermentnan potente pa bida. FOCUS ta desea tur esunnan cu ta traha den enseñansa na Aruba, hopi exito, sabiduria, pasenshi, positivismo y energia pa e Aña Escolar 2018-2019.
