Actonan di un persona ta defini su caracter y e caracter di un persona ta bisa hopi di su personalidad. Den bida nos mester ta consciente cu dificilmente nos por cambia un persona su caracter y mentalidad. Pesey, prome cu actua, mester pensa bon, e malo y e consecuencianan cu e acto por trece cu ne. Hopi di nos ta actua sin pensa y despues nos kier lamenta y pidi despensa, pero ya e daño ta haci y kisas te hasta no ta reparabel.

Hi Michelle,

Danki pa un espacio den bo seccion, un seccion cu ta inspira otronan pa bin dilanti y conta nan storia di Bida Real. Cada storia di Bida Real ta sirbi como un experencia mas den bida di otro, storianan cu ta touch cada lector. Den mi caso, bo seccion a sirbi como un sosten pa mi bin dilanti cu mi storia. Mi ta un dama profesional, bon studia y cu un posicion clave den un compania aki na Aruba. Mi matrimonio no ta uno ‘de color rosas’. Mi tabatin momentonan di alegria y goso, pero tambe momentonan di tristesa y maltrato. Hopi biaha locual cu un hende wak den publico no ta e realidad na cas. E mundo di Social Media a filtra den hopi matrimonio na Aruba, y mi por bisa bo cu esaki tabata un gran parti di mi destruccion matrimonial tambe.

Mi bida matrimonial tabata uno bon, manera tur pareha na comienso di cada relacion y matrimonio. E atencion tabata tey, e respet y cariño no tabata falta. Nos tabata sali hopi y tabata forma parti na e bida social di Aruba. No tabatin un evento cu nos tabata falta. Despues di algun aña e bida matrimonial a cuminsa tuma un otro rumbo. E atencion a cuminsa bira menos, e cariño a comberti su mes den custumber y e salimento a cuminsa bira menos. Nos cada un a cuminsa tuma nos mesun rumbo, tanto na cas como den nos bida social y cu nos amistadnan. Un bida matrimonial for di balans ta hopi vurnerabel pa e bida social aki na Aruba. E ta increibel con homber- y muhernan ta wordo confronta cu invitacion pa un ‘date’ sin importa cu e persona ta casa of no of si ta den un relacion.
Hopi biaha bo ta wak cu muhernan ta busca un sosten cerca un otro persona den momentonan dificil cu nan ta pasando. Hopi hende ta interpreta e sosten como un acto di falta atencion of falta di cariño. Den mayoria caso e no ta asina, e ta un sosten mas bien pa combersa y di por wordo scucha sin cu hende husga of tira cos den cara. Nos a cuminsa na pleita hopi den cas, tabata insulta otro diferente biaha cu e amor, respet y cariño a cuminsa comberti su mes den odio, disgusto y distancia.
E unico persona cu a nota algo tabata e miho amigo di mi casa. El a acerca mi puntrando si tur cos ta ok, si entre ami y mi casa tin cosnan ta pasando. Mi a combersa cu ne y conte den kico tur mi ta pasando aden. Mi por a ripara na su reaccion cu e no tabata sa nada y cu e noticia a yega manera un sorpresa pe. Nos tin un amistad di mas cu 10 aña, nos tin un confiansa cu otro y semper nos tabata cla pa yuda y sostene otro. Mi a cera conoci cu ne door di mi casa. Un bunita amistad sigur nos tabata tin tur hunto. Den nos mesun combersacion, el a bin confesa mi cu e tampoco no ta bibando bon cu su casa. Ya tin varios luna cu nan ta bibando den camber separa y cu nan si a yega na e punto pa divorcia. E unico duele cu e tin ta cu e tin dos yiu chikito cu e ta stima hopi.

Mi a ripara cu nos combersacionnan ta haci mi bon, mi mente ta mas calmo y mi por pensa cu mas claridad. Nos sa topa otro varios biaha pa sinta relaha y combersa di bida. Ami ta purba na yuda cu conseho y e na su turno mesun cos. Nos a prefera di mantene nos encuentro den secreto pa evita cu hendenan por bay interpreta nos amistad pa algo mas. Mi gana pa topa cu ne cada biaha a bira mas hopi, mi no por warda pa nos topa y combersa. Mi no sa si e tabata un sentimiento cu mi a cuminsa na sinti pe ni tampoco si e ta mutuo, pero mi no ta nenga cu mi ta pasa bon cu ne. Den un di e biahanan cu nos a topa, e combersacion e bay riba nos futuro, nos siguiente stap den bida. Kico nos kier logra despues di divorcio. Pa mi e tabata un poco dificil paso ainda mi no a yega na e desicion pa divorcia pues nos mester a cambia e topico. Eynan el a ‘hit’ mi cu mi matrimonio a yega su final. Mi no sa si mi ta stima mi casa ainda pero mi no tin duele, sino mas bien alivio. Un di nos ultimo salimentonan a termina cu nos a duna otro un sunchi, eynan ta caminda cu mi a realisa kico mi ta sintiendo.
Siendo ainda casa, mi ta sinti cu mi ta cometiendo un eror y e ta mustra cu ta pa mi motibo cosnan a bay robes, cual no ta e caso. Mi a yega na un decision cu mi lo pidi mi divorcio paso cosnan no ta mehorando y mi kier continua cu mi bida. Kisas cu e persona cu lo por duna mi e felicidad cu mi casa no por a duna mi nunca. Pa un periodo di mi bida mi tabata feliz, pero gran parti mi a pasa mi bida ta yora y sufri, cos cu mi no kier mas. Ta basta pensa y keda kere cu cos lo drecha. Awe mi por bisa mi ta feliz.
Mi casa no a tuma e noticia di divorcio na serio y a kere cu ta un idea pasahero mi tin ta cana cu ne den mi cabes. Cada bes cu mi kier a touch e tema cu mi casa, e combersacion ta caba den pleitamento formal. Mi a tuma mi desicion pa cana e caminda legal mi so, locual cu nan ta yama ‘enerzijds’, algo cu mi casa a pensa nunca mi lo a haci. Un ley di bida cu mi tin, ta unabes cu mi tuma un desicion pa haci algo den bida, mi ta para firme su tras. Un proceso largo y dificil pero contento cu mi a logra mi libertad. Un matrimonio sigur no facil.

Hopi hende a tuma mi na malo riba e desicion cu mi a tuma pero hopi no sa di e bida cu mi tabatin. E amigo di mi casa tampoco no tabata tin’e facil. Hopi hende a bira lomba p’e pa motibo cu nos a cuminsa un romance. E tabata dificil pa ambos di nos cual tin biaha tabata pone nos pleita pero semper nos por a yega na un comprendimiento cu otro, algo cu mi ta balora masha hopi mes paso ta cos cu mi no tabata tin cu mi ex-casa. Nos romance a keda solamente na un romance, nos nunca por a formalisa nos union paso ambos di nos no kier a bolbe drenta den un matrimonio. Nos ta bibando hunto y esey ta locual cu pa nos ta conta. Nos ta OK cu nos bida y relacion asina.
Hopi biaha bo ta kere cu esun mas cerca di bo conoce bo, pero no ta tur ora e ta asina. E ta dificil pa entrega 100% di bo mes na un persona asina yega na bo ex-casa. Nan amistad a keda igual y ora cu tin fiesta di amistadnan mi ta opta pa no bay pa evita mi topa cu mi ex-casa. Asina poco poco nos relacion a cuminsa wordo afecta. Nos pensamento a cuminsa cambia y e sentimento di amor, e felicidad a cuminsa bay. Nos relacion ta mas bien un amistad y no uno di pareha mas. A yega un punto cu el a cuminsa bisa mi kico pa bisti, kico pa come of kende mi no por saluda mas. E cosnan di prohibicion aki a pone mi pensa dos biaha y duna mi e forsa pa mi hala atras y sali for di un relacion cu lo por bay tin un futuro scur.
E moral di mi storia ta cu nos no mester tene duro na cosnan cu ta haci nos daño, ni cuanto cu nos stima e persona of cuanto aña nos tin ta biba cu ne den un matrimonio, mester habri man y laga bay! Cada dia cu pasa den e relacion, ta un dia mas di tristesa, un dia mas di maltrato y ta un dia mas di sufrimento. Ni con duro e situacion ta of kende tur por bira lomba pa bo, habri man y ‘let it go’. Awe mi ta feliz y mi por papia cu mi a encontra felicidad despues di hopi tempo. Mi tambe tabata tin e miedo, e temor pa start di nobo. Ta yega un punto den bida cu bo mester scoge pa bo mes. Awe mi ta mi so, bibando un bida trankil sin ningun homber pa bisa mi kico pa haci y con pa biba. Soltera pero feliz

Nos kier a gradici e dama aki pa su storia, su experencia pero mas aun pa su confiansa duna na e seccion di Bida Real. Nos ta keda pone enfasis cu ningun hende tey pa husga, niun di nos ta perfecto. Cada persona tin e derecho pa ta feliz cu e persona cu e kier ta felis cu ne, den e caso aki pa un tercer oportunidad como soltera. Den tur problema y den tur relacion, amor ta prevalece. Tur nomber lo keda reserva pa proteha e identidad di cada persona. Den nos siguiente edicion, un otro storia cu contenido profundo. MH

LEAVE A REPLY

Please enter your comment!
Please enter your name here