Durante un evento social aña pasa na augustus, a acerca Jovȇlle pa ta riba e portada di april 2019. Despues di e perdida di su tata, Poentje Castro, el a siña cu nunca e lo supera locual a pasa, pero el a siña biba cu ne y tempo ta e miho cura pa tur cos. Su mama Valerie ta su guia y consehera den su bida diario, mientras cu su rumannan Marzjhon y Jhonier, e ta gusta pasa tempo liber sea na cas of nan ta sali hunto.
Traha cu persona cu limitacion di bista, ta algo cu semper Jovȇlle tabatin interes aden. Den su buskeda pa trabou, e oportunidad a presenta pa guia un mucha muhe ciego den enseñansa regular. E no a pens’e dos biaha y el a acepta e reto nobo aki. Jovȇlle a aplica na SKOA y a acept’e como e prome “Leerlinggebonden Assistent van een blinde na Aruba” y a ricibi 100 % sosten di FAVI. Como cu esaki ta algo totalmente nobo den enseñansa regular na Aruba, e mester a specialisa su mes den e ramo aki bou di e guia di FAVI. Aki el a siña e ortografia di braille y con pa adapta material didactico. Jovȇlle ta e alumno su wowo na scol. E ta considera su trabou como su ‘super power’, paso skirbi y lesa braille, sigur no ta algo cu cualkier persona por eherce… Por lesa e entrevista cu Jovȇlle Castro den edicion di FOCUS di april.
