Un problematica cu ta tumando lugar pa hopi decada caba y siguramente no ta un secreto cu esaki tambe ta existi na Aruba, ta violencia domestico. Na Aruba entre aña 2015 pa 2017 statistica ta mustra cu tin mas cu 500 caso di violencia y abuso domestico registra na Fundacion pa Hende Muher den Dificultad so. Mayoria biaha e victima di abuso y violencia domestico ta hende muher y segun e World Health Organization “1 den cada 3 hende muher mundialmente a yega di experencia un of mas forma di abuso fisico y/of sexual cu nan pareha den nan bida”.
Luna di october ta luna nacional di conscientisacion encuanto prevencion di violencia domestico. Lamentablemente ta stigmatisa e victimanan di violencia domestico den comunidad y esaki ta inclui e comentarionan of insulto verbal entre otro: “e merece di a haya un bati”, “e mes a busca pa esey pasa cu ne”, “el a provoca su pareha”, “e tabata infiel y por a spera cu esey lo pasa”. Den edicion di revista FOCUS di e luna aki e Topico; E Ciclo Vicioso y Consecuencia Mortal di Violencia Domestico: KI ORA TA BASTA?, por lesa tur e puntonan tocante, ‘Forma di violencia y abuso domestico’ y ‘Conoce e ‘red flags’ di abuso den un relacion’. Un interesante topico skirbi pa Keyla Reeder.
