For di 2018 Gerencia di Aruba Bank a acepta pa uni na e Missing Chapter Foundation su ‘Kids Council’. E iniciativa aki ta parti di e MCF, cu ta funda pa Prinses Laurentien y tin e meta pa yuda e companianan tuma e desicionnan sostenibel. E meta di Kids Council ta pa duna nos muchanan un ‘structurele stem’ den companianan y/of organisacionnan. Durante di e luna di juli, e ‘Kids Council’ 2021 di Aruba Bank, cu ta consisti di e muchanan di “Creative Kids Club’, a presenta nan recomendacionnan na e institucion financiero.
Entre otro e grupo di studiante a haci sondeo y bishita Plastic Beach party pa por haya un idea di kico tur por wordo recicla. Nan a haci un tremendo presentacion caminda nan a presenta nan recomendacion pa bira mas sostenibel, entre otro, pa medio di instala e panelnan solar, traha tarheta di e materialnan recicla y door di haci uzo di smartphones y tablets como e medio di comunicacion. Aruba Bank ta felicita cada participante cu a forma parti di e bunita proyecto y alabes gradici e grupo completo pa presenta diferente idea sublime cu Aruba Bank lo haci uzo di dje den futuro.
