Ayera e supermodel di 56 aña a comparti un post riba Instagram, unda el a skirbi cu el a haci un procedemento pa reduccion di vet ‘CoolSculpting’ cinco aña pasa, cu a lage ‘deforma permanentemente’. Awo e ta bay presenta un demanda contra Zeltiq Aesthetics, e empresa encarga di CoolSculpting.

Subtitulando su post cu e hashtags, “#TheTruth” y “#MyStory,” Evangelista a cuminsa su declaracion, skirbiendo: “Awe mi a tuma un paso grandi pa coregi un fout cu mi a sufri y mi a warda esaki pa mi mes durante mas cu cinco aña”.

“Pa mi seguidonan cu a puntra dicon mi no tabata trahado mientras cu e carera di mi compañenan a prospera, e rason ta cu mi a ser desfigura brutalmente pa e procedimento di Zeltiq CoolSculpting cu a haci contrario di loke nan a priminti, el a continua den e post.

Evangelista despues ta bisa cu desde e tempo ey, el a desaroya ‘Paradoxical Adipose Hyperplasia of PAH’, un efecto secundario hopi raro pero grave, unda e celnan di vet especificamente na e parti di tratamento ta crece mas na luga di bira mas chikito. E modelo a bisa cu e no a wordo informa di e riesgo prome cu e procedemento.

“PAH no solamente a destrui mi fuente di entrada, el a manda mi den un ciclo di depresion y tristesa profundo, y e profundidadnan mas abou di autodesprecio “. Cerando su post e supermodel di decada di 1990, a comparti su plannan pa tuma accion legal y el a skirbi: ”Cu e demanda aki, mi ta avansando pa deshaci di mi berguensa y haci mi storia publico. Mi ta cansa di biba di e manera aki. Mi ta desea di por sali di mi porta cu cabes na laira apesar cu mi no ta mustra manera mi mes mas”.

LEAVE A REPLY

Please enter your comment!
Please enter your name here