Aruba Airport Authority ta yama bonbini na Porter Airlines como un partner di aerolinea nobo na Aeropuerto Internacional Reina Beatrix (AUA), dunando e localnan mas opcion na momento di biaha pa Canada. Cu vuelonan cu ta conecta Aruba pa Toronto y Ottawa, Porter ta ofrece te cu nuebe vuelo nonstop tur siman entre Aruba y Canada.
E servicio Toronto-Aruba di Porter a inicia dia 30 di october 2026 y ta opera te cu seis biaha pa siman. Servicio di Ottawa-Aruba a inicia dia 7 di november 2026 y ta conta cu tres vuelo pa siman durante e temporada di biahe di mas halto esta winter. E demanda fuerte despues di e lansamento inicial a pone cu Porter a agrega vuelonan for di tanto Toronto como Ottawa durante e periodonan mas halto di winter.
E partnership nobo aki ta amplia e conexionnan di Aruba cu Canada. Pa AAA, construi relacionnan cu e aerolineanan ta parti di su compromiso pa mantene e isla bon conecta pa medio di vuelonan confiabel cu ta cumpli cu e necesidadnan di comunidad y ta sostene e futuro di Aruba. Trahando estrechamente cu e aerolineanan y e partnernan di turismo ta yuda sigura cu e conexionnan aki ta sostene e metanan di Aruba p’un turismo balansa y sostenibel.
“Yama Porter bonbini na Aruba ta marca e comienso di un partnership nobo y ta trece un escogencia mas amplio pa nos comunidad na momento di biaha pa Canada. E servicio di Toronto y Ottawa ta amplia e opcionnan disponibel pa e residentenan, sea nan ta bishita un ser keri, explora un destinacion nobo of biahando pa negoshi. Nos ta anticipa di por traha estrechamente cu Porter y nos partnernan di destinacion pa sostene e conexionnan aki na un manera cu e ta alinea cu e prioridadnan a largo plaso di Aruba”, asina Jonny Andersen, CEO di Aruba Airport Authority N.V. a duna di conoce.
“E interes di e Canadesnan pa biaha pa Aruba a crece di un manera constante y awo e pasaheronan por disfruta di e servicio premia di Porter den tur aspecto di nan experiencia di vuelo”, asina Andrew Pierce, vice president, network planning and reporting, di Porter Airlines a expresa. El continua bisando cu: “Cu su servicio di nivel halto abordo, Porter ta ofrece hospitalidad genuino cu ta coresponde cu loke Aruba ta ofrece su bishitantenan, esaki ta inclui biña y cerbes gratis, snack Canades di calidad premium y un cabina sin stoel memey”.
“Aruba ta contento di por yama bonbini na Porter Airlines y su servicionan nonstop for di Toronto y Ottawa. E biaheronan Canades ta comparti hopi di e balornan cu ta den curason di e enfoke di Aruba pa cu turismo responsabel, for di aprecia nos medio ambiente natural te na sostene nos comunidad local. E conexionnan nobo aki ta ofrece un otro oportunidad pa yama bonbini na e bishitantenan di Canada, e di tres mercado mas grandi di Aruba. Nos ta spera di por construi un partnership fuerte cu Porter Airlines”, asina Ronella Croes, CEO di Aruba Tourism Authority a bisa.
“E incorporacion di Porter Airlines ta un stap positivo pa fortalece e conexion di Aruba cu e mercado Canades. Door di conta cu e servicionan directo desde Toronto y Ottawa, nos tin e oportunidad di laga nan cera conoci cu e hospitalidad, cultura y e experiencianan di nos isla na mas biahero Canades. Nos ta spera di por establece un colaboracion solido cu Porter cu ta sostene e ambicionnan turistico di Aruba y ta agrega pa nos comunidad”, Minister di Turismo Wendrick Cicilia a expresa.
Pa marca e lansamento di ambos ruta, AAA tabatin un celebracion di bonbini den e sala di check-in di aeropuerto dia 30 di october pa e vuelo di Toronto y riba dia 7 di november pa e vuelo di Ottawa. E celebracionnan a reconoce e personal di e compania di aviacion y e teamnan local cu ta sostene e vuelonan di Porter na Aruba y a brinda un oportunidad pa gradici nan pa nan trabou den preparacion pa e lansamentonan.
AAA ta spera di por traha hunto cu Porter, Aruba Tourism Authority y partnernan local di aviacion pa sostene ambos ruta y brinda un experiencia agradabel pa e pasaheronan cu ta biaha a traves di Aeropuerto Internacional Reina Beatrix.
