Zury Ruiz a biaha dia 25 di November pa Ecuador unda el a representa Aruba na e certamen Miss Teen Supranational. Un siman cu un programa hopi intensivo cu tabatin inclui e.o. photoshoot, tours y training. E siman a cuminsa bon cu un welcome dinner y for di momento aki tur hende a haya un hopi bon impresion di Zury. Despues pa e siguiente eventonan nan tabata warda con Zury lo luci, tanto su vestuario, makeup y peinado. Hopi di su pañanan tabata diseño propio como tambe outfits di D Shop Aruba. Loke a ser nota ta cu pa tur evento Aruba semper tabata e prome den lobby. Den varios ocasion organisacion tabata duna e candidatanan solamente 15 minuut pa core cambia pa e siguiente evento.
E anochi final Zury a luci un tremendo shimis pa entrevista di hurado diseña pa Allan Kock y Lufron Hayworth. Despues a sigui e parti di talento, opening, bathing suit y gala. Di opening caba Zury a acapara e publico den su bell bottom jeans, cu a sigui den su trahe di baño cu a wordo diseña pa su propio persona. E momento tan espera di e anochi a yega unda Zury a sali den su trahe di gala blanco diseña pa Edson Everon, y dorna tambe pa Edson y Jermaine Carrasquero, cu mas di 1000 piedra swarovski, perla y flor riba e saya cu a duna e shimis un toke mas hubenil. Na momento di pregunta Zury tabata hopi sigur di su mes y esaki tambe a bay super bon unda full e teatro a bati man pa su contesta.
Na final di anochi como premio special Zury a gana e premio di BEST BODY y tambe MISS TEEN WORLD. Peru a resulta 2nd runner-up, Ecuador 1st runner-up, Paraguay Miss Teen Tourism y Panama Miss Teen Supranacional. Mester remarca cu e “bara” manera nan ta yame na Ecuador cual ta e sala tabata grita full pa Aruba. Zury y su Team a haya invitacion pa Brazil pa otro aña.Hunto cu Zury a biaha Allan Kock cu tabata su hairdresser, Laury Dabian su makeup artist, Edson Everon su runway coach y preparador hunto cu Robin Croes su manager/preparador y su social media promoter, y cu su tanta Susan Kelly como su coach tambe. Pabien Zury y Team!
