Despues di un otro anochi cu tweets di Kanye West, Kim Kardashian a responde cu un declaracion, unda e ta bisa cu e ta apoya su casa ‘complica’. Kardashian a lansa un declaracion emocional riba su instagram story, despues di e ultimo tweets di Kanye West, unda e ta afirma cu e kier a divorcia su casa y tambe el a yama Kris Jenner “Kris Jong-Un”. A pesar di su tweets controversial, Kim a bisa cu e ta apoya su casa cu ta bipolar.
Kim den su prome instagram story a share: “Manera hopi di boso sa, Kanye tin ‘bipolar disorder’. Cualkier hende cu tin esaki of cu tin un ser keri cu tine sa con complica y doloroso e ta pa compronde. Ami nunca a papia publicamente con esaki a afecta nos na cas, paso mi ta proteha nos yiunan hopi y Kanye su derecho pa su privacidad. Pero awe, mi ta sinti cu mi mester comenta door di e stigma di salud mental”. El a continua: “Esunnan cu compronde enfermedad mental of incluso comportamento compulsivo sa, cu e famia ta sin poder, menos si e miembro di famia ta un menor. Hendenan cu no ta consciente of ta mucho aleha di e experencianan aki, por husga y no compronde cu e individuo mester envolve su mes den e proceso pa haya ayudo, sin importa con duro e famia ta purba di yuda”.
Den su segundo story Kim a bisa: “Mi ta compronde cu Kanye ta suheto di critica paso e ta un figura publico, y su accionnan por causa opinion- y emocionnan fuerte den hende. E ta un persona briyante pero complica, ademas di e presionnan di ta un artista y homber color scur, tambe el a experiencia e perdida doloroso di su mama, y e mester a deal cu e presion y e isolacion cu ta aumenta su ‘bipolar disorder’. Esunnan cu ta cerca di kanye conoce su curason, y nan ta compronde cu su palabranan tin biaha no ta alinea cu su intencionnan”.
“Bibando cu ‘bipolar disorder’ no ta disminui ni invalida su soñonan y su ideanan creativo, sin importa con grandi of imposibel e por sinti pa algun hende. Esey ta parti di su genio y manera hopi a presencia, hopi di su soñonan a bira realidad”. Kim Kardashian ta conclui su declaracion skirbiendo: “Nos manera sociedad mester papia di duna gracia na e tema di salud mental, sin embargo, nos tambe mester dune na e personanan cu ta biba cu ne den e momentonan cu mas nan mester di dje. Mi ta pidi amablemente pa e media y publico duna nos e compasion y empatia cu nos mester pa nos por supera esaki. Danki na esunnan cu a expresa preocupacion pa e bienestar di Kanye y danki pa boso comprension”.
